Shillong: Ka Sorkar Jylla ka la phah noh shwa shipor ia ki ïew khappud lane Border Hat kiba don ha khappud bad ka Bangladesh, bad kane ka rai jong ka Sorkar ka long hadien ka jingiakynad kaba jur kaba la mih ha ri Bangladesh.
Katkum ka khubor ba la ioh mynta ka sngi Palei, Ki Border Security Force (BSF) bad ki pulit ka Jylla ki la iasam jingtip, bad na ki tnat syntiat la ai jingtip ba ka lah ban don ka jingthmu ban wan rung beaiñ da ki nong Bangladesh, ki kynhun kaikhlaw, ki nongkhaïi beaiñ, bad kiwei kiba don da kiwei ki jingthmu lada plie ia ki ïew ha khappud.
Kumba ka long mynta ha shi lynter ka khappud Meghalaya bad Bangladesh ki don ar tylli ki ïew border hat, kawei ha Balat kaba hap hapoh East Khasi Hills district, bad kawei pat ha Kalaichar hapoh South West Garo Hills district.
Nalor kine ki ïew khappud bad la ithuh da ka Sorkar don ruh kiwei ki ïew ha khappud, hynrei kine ki ïew ruh kim treikam, bad na ka liang ka Sorkar Hadien ba la ioh ia ka jingai jingmut na ki BSF bad ki Pulit ka la bthah ban khang noh shwa ia baroh ki ïew ha khappud tat haduh ba ka jinglong jingman ha Bangladesh ka la bha biang.
Lah ban kdew ba hadien ba ka jingiakynad ka la jur hapoh ka ri Bangladesh, ka Sorkar Jylla ha ka 6 tarik mynta u bnai ka la pynjari da ka curfew miet hapoh 200 meter ki jaka khappud na u rishot ha baroh shi lynter ki khappud bad ka Bangladesh kaba jrong 443 KM, bad kane ka curfew kan treikam haduh ban da pynbna da kumwei pat.
La ioh jingtip ba ka Sorkar Jylla kan sa lum ia ka jingïalang bad baroh kiba don bynta naduh ki heh ophisar, ki heh jong ki BSF bad ka tnat pulit, ban bishar ia ka jinglong jingman ha khappud, khamtam ban iada na ki nongleh kam beaiñ pyrshah ri, kiba thmu ban shim kabu ia ka jinglong jingman ha Bangladesh.