Shilllong: Ka tnad thain jain ka jylla ha kane ka sngi Balang ka la pynlong ia ka jingpyni sarong ia ki riam kiba la shna bad thain hi ki briew na kane ka jylla shi bynta ha ka jingrakhe ia ka National Handloom Day 2024 ha Soso Tham Auditorium.
U myntri ka tnad thain jain, u bah Paul Lyngdoh uba shim ia ka bynta kum u kongsan, u la kyntu ia ki kynhun bapher bapher ban iakit khlieh lang ban kyntiew shuh ia ka sap jong ki briew kiba don ka bynta.
Ha kane ka prokram la sakhi lang ka mem na Scotland, ka Dr. Anna Louise Meynell kaba dei ka riew tbit ha International Textiles Expert, nalor u Principal Secretary, bah Frederick R Kharkongor nalor kiwei pat.
U bah Paul u la ong ba ka long kaba sngew tynnad ba ki don ki nongthain jain thain kup kiba la iaid sha ka pateng kaba lai ha kane ka kam. Ha kajuh ka por, u la ong ba ki nongthain na kane ka jylla, kila ioh ia ka jingpyrto wat na ki briew ka dewbah Europe.
U myntri ula pyllait ruh ia ka Meghalaya Textile Directory cum Textiles Atlas bad ruh ia ka e-portal jong ka tnad thain jain.
Ia ka jingiaid pyni sarong ia ki jain riam la shim bynta ki samla pule ka Fashion department ka KL Bajoria College bad ka jingiaid pyni dait riam la leh da u bah Daniel Syiem.
Pyni sarong ka tnad thain jain ia ki riam ba khring bad shongkun
