Shillong: U nongialam ka liangpyrshah hapoh ka iing dorbar thawain ka jylla, u bah Ronnie V Lyngdoh ula ong ba u la ioh jingtip ba ka jingshim jaka na bynta ban shna noh ia ka surok sepngi ne western bypass kaban kiar ia ka sor Shillong ka la iaid sha ka 95 percent.
Halor ka jingkylli ba un rah ne em hapoh ka ïing dorbar ia ka jingeh jong ki paidbah na ka jingsahkut kali, u bah Ronnie u la ong ba u la ioh jingtip na u symbud myntri rangbah ka jylla u bah Prestone Tynsong, uba peit ia ka tnad PWD ba ka jingaiti ia ka jaka sha ka kompeni NHIDCL ban shna ia ka surok sepngi ne Western Bypass ka la iaid sha ka 95 percent bad kane kan iarap shi katdei eh ban pyllait na ka jingsahkut kali ka sor Shillong.
U bah Ronnie u la ong ba lada dep ban shna ia kane ka surok sepngi ka sor Shillong, ki kali kiba wan na Assam ban leit sha Sohra, Pynursla, Dawki bad kiwei ki bynta, kim donkam shuh ban iaid na sor hynrei kin shu suh beit sak shathie bad kane kan pyllait ia ka jingdheng kali.
Ula kyrmen ba kin sdang noh iaka jingpyntrei ha kane ka tlang ban wan. U la ong ba ka jingdon ka Shillong Bypass na Umroi sha Mawryngkneng ka la iarap shibun ha kaba ki kali kiba leit sha Silchar bad kiwei ki bynta ka thain Jaintia kim iaid shuh na sor.
95 percent la dep aiti ia ki jaka sha ka NHIDCL ia ka surok Western Bypass
