Shillong: Dang shen, ka dorbar shnong Mawsynram ka la rai ban pyrshah jur ia ka jingpyllong ia ka krem mawjymbuin kum ka jaka mane blei, bad ka dei ban long beit tang ka jaka jngohkai. Kane ka jingpyrshah ka shnong Mawsynram ka long hadien ba ka kynhun ki riew ngeit Hindu ki la thmu ban pyllong ia kane ka krem kum ka jaka mane bad kila pynkhreh ruh ban iaid yatra.
U MLA ka Mawsynram u bah Olland Sing Suin u la ong ba ka la don ka jingwan iaid yatra ha ki khyndiat snem bad ka dorbar shnong Mawsynram ka la iohi ia ka jingjaboh jabain kaba la isih ia ka sawdong sawkun ha katei ka jaka.
Katkum ka jingong u MLA, shisien ba ka dorbar shnong kam shah, ka jingai jingbit ka bor synshar na ka district ruh, kan ym treikam namar ba ka la buh kyndon ba ki dei ban ioh jingbit na ka shnong.
U bah Olland ula ong ba ka krem mawjymbuin kam dei ban long ka jaka mane blei hynrei ka dei ban long ka jaka ban jngohkai ia ki paidbah baroh namar ba lada pyllong ia ka kum ka jaka mane ia kano kano ka jait niam, kan ym pyllong ia kiwei pat ban sngew tynnad.
Lah ban kdew ba ka la don ka jingthmu ban pyllong ia ka jingiaid yatra sha katei ka jaka ha ka 10 bad 11 tarik mynta u bnai hynrei ka dorbar shnong Mawsynram ka la pyrshah ia kane.
Iahap u bah Olland ia ka sur ka dorbar Shnong Mawsynram halor ka krem Mawjymbuin
