Shillong: Ka samla Bahun Nongrum ka la jop kum ka Miss Meghalaya katba ka samla Fortunate Mika Dkhar kum ka Miss Teen Meghalaya 2024.
Ia kane ka rynsan la pyllong ha ka sngi Saitjain ha Lariti Performing Hall, Mawkasiang. Ka samla Chaivalry Lartang bad ka samla Lily Kharthangmaw kila jop ha ka 1st bad 2nd runners-up ha kane ka jingiakop ki thei bha briew.
Ka samla Bahun kan mihkhmat ia ka Meghalaya ha ka Miss Universe India 2024, katba ka samla Chaivalry bad ka samla Lily kan mihkhmat ia ka Meghalaya ha ka Miss Northeast 2024 kaban long ha Itanagar, Arunachal Pradesh.
Ha ka kyrdan ka Miss Teen, ka samla Palei Chyne bad ka samla Nikita Nongrum kila wan ha ka 1st bad 2nd runners-up. Ka samla Fortunate kaba jop ia ka Miss Teen kan mihkhmat ia ka Meghalaya sha ka rynsan Miss Teen Diva kaban long ha Jaipur, Rajasthan.
Ia kane ka rynsan la pynshong kun shuh da ka jingdon u myntri ka tnad jngohkai bah Paul Lyngdoh, kumjuh u bah Sanbor Shullai, Chairman ka Meghalaya Tourism Development Corporation (MTDC) nalor u bah Federick Roy Kharkongor, Principal Secretary ka tnad Lariti.
Ki nongbishar ha kane ka jingiakop ki long u Amjad Khan, Director ka Operations and Marketing for Miss Universe India; ka Arshina Sumbul, Miss Grand International India 2023; ka Divija Gambhir, State Director for Miss Universe Rajasthan and Miss India Multinational 2021; bad u Mele Pucho, State Director for Miss Universe Nagaland.
Kaba jop ia ka Miss Meghalaya 2024 ka ioh ia ka khusnam T. 1 lak, katba kaba long baar ka ioh T. 50,000 bad kaba balai T. 25,000.
Ka lahduh ka Miss Teen Meghalaya 2024 ka ioh T. 25,000 katba kaba long baar ka ioh T. 15,000 bad kaba lai T. 10,000.
Ka samla Bahun ka Miss Meghalaya, ka samla Fortunate ka Miss Teen Meghalaya 2024
