Shillong: U Additional Director General, BSF (Eastern Command), Kolkata, u Ravi Gandhi, ula wan jngoh ia ka Meghalaya ban peitngor bad bishar ia ka rukom pahara bad treikam ki shipai BSF ha khappud.
Ha ka sngi Saitjain, u ADG u la hiar sha ki khappud kiba hap ha East Khasi hills ban bishar, ban peitkhai ia ki jingdonkam ban pynkhlain ia ka jingtreikam ki BSF. U la ong ba ki BSF watla hapdeng ka jinglong kaba eh kaba tan bha, hynrei ki lenlade ban pahara ia u pud u sam ka ri khamtam ha kane ka jylla Meghalaya kaba bun ki samoi ki jhieh beit na ka jingjur u slap.
Mynta ka sngi, u ADG ki BSF ula lum ia ka jingialang ryngkat ki ophisar bad ki pulit ka Garo Hills District kynthup u DIG Police, DC & SP Tura. Ka la don ka jingiamir jingmut ban wanrah ia ka jingiatreilang ka jingiajan hapdeng ki BSF bad ki pulit. La ban jur ruh ban pynkhlain ia ka jingpeitngor ia ki khappud lyngba ki tiar juk stad mynta, khnang ban tehlakam ia ki kam beain kum ka jingshalan tuh, ka jingwan rung tuh ki briew sha India.
U ADG ula kut jingmut ban pynkut shi syndon ia ka jingwan rung tuh ki briew nabar sha ka ri India.
Hiar u heh BSF sha khappud ban beit ia ka rukom pahara ha shi lynter ki khappud
