Shillong: Ka Sorkar Jylla mynta ka sngi Thohdieng ka la rai ban pynkhlaiñ shuh shuh ia ka aiñ nongbylla bar Jylla, ka Meghalaya Identification, Registration (Safety and Security) of Migrant Workers Act, 2020, ban lah ban tehlakam ia ki nongbylla kiba wan na shabar jong ka Jylla.
Haba kren hadien ka jingïalang ka Kynhun Myntri, u Myntri uba dei u nongaiktien ka Sorkar MDA II, u Bah Paul Lyngdoh u la ong ba ka Sorkar ka la wanrah ia kane ka amendment na ka bynta ban pynbha shuh shuh ia ka aiñ kaba la don lypa, khnang ban lah ban peitngor bha ia ki nongbylla kiba wan na shabar ka Jylla, bad ban pynthikna ba tang ki briew ki bym don dak sniew ne leh kam runar kin ioh ban wan bylla ha kane ka Jylla.
U la ong ba ka Sorkar Jylla kan pyntreikam ruh ia ka Crime and Criminal Tracking Network System (CCTNS), jong ka Sorkar pdeng ban tip ia ki nongbylla bar Jylla kiba kumno, bad tang kito ki bym don dak sniew kin ioh ban trei bylla. U la ong ba ki pulit lyngba ka CCTNS kin sa lah ban ithuh bad tip kiba kumno ki briew kiba wan bylla sha kane ka Jylla, bad na ka bynta kane kan don ruh ka jingiatreilang hapdeng ki pulit bad ka tnat Labour ban lum thup bad pynrung kyrteng ia ki nongbylla kiba wan na shabar.
Ha kajuh ka por u Bah Paul u la iathuh ba ka Kynhun Myntri hapoh kane ka aiñ ka la mynjur ruh ban pynkiew noh ia ka kuna ia kito ki contractor kiba wan ialam beaiñ ia ki nongbylla bar Jylla, ha kaba la pyntip ba haduh mynta ka kuna ka long tang T.5000, bad da kane ka rai jong ka Sorkar ka kuna kan long T.1 lak na ka bynta uwei u nongbylla, bad ka jingset phatok kaba haduh 3 bnai ia kito kiba bteng ban pynkheiñ aiñ bunsien.
Lah ban pynpaw ba kane ka sienjam jong ka Sorkar ban pynkhlaiñ ia ka Meghalaya Identification, Registration (Safety and Security) of Migrant Workers Act, 2020, ka la wan hadien ba ki dkhot jong ka Khasi Students’ Union (KSU) ki la bteng ban khynra ia ki nongbylla bar Jylla ki bym biang ia ki kot ki sla, kaba la wanrah pat ka jingduna ki nongbylla bad ka jingsahkut bun tylli ki project jong ka Sorkar bad kumjuh ki jingtrei jong ki riew shimet.