Shillong: Ka myntri ka tnad ka koit ka khiah ka jylla ka kong Ampareen Lyngdoh ka la ong ba ka kmie ha ka por ba ka kha khunlung ka hap ban peit miet ban kynoi ia ki khun ban bsa ban ai buin, kaba dei ka kam kaba dawa bym long satia ban ieh da lei lei ruh. Hynrei ha kajuh ka por, ka la ong ba lada don lem ki kpa kiba iarap ia ka lok ban kynoi khun khamtam ha ka por mynmiet, kan long ka kam kaba khraw shisha bad kum ia kita ki kpa, dei ban ai khunsam ruh.
Ia kane ka la kren ha ka jingpyllait ia ka World Breastfeeding Week 2024 ne ka taiew ai buin ha ka pyrthei kaba la pyllong ka District Health Society, ka National Health Mission, East Khasi Hills ha Pomlum PHC mynta ka 1 tarik Nailar 2024.
Ka la ong ba ka kmie ka dei ban long kaba koit kaba khiah khnang ba kan lah ban ai bam thikna ia ki khun. Ka la ong ba lada don mano mano ba pynbakla ban ai buin ia ki khun, ki dei ban pyntip sha ka sorkar mardor.
Ka la ong ba baroh ki longkmie kiba ioh khun ki don ka hok ban ioh shuti 6 bnai hadien ba la kha khunlung.
Ka la ong ba ki jaka sumar ka sorkar ki donkam ban don ka jaka buh dud ym tang ka jaka buh snam.
Shwa ia kane, u MLA ka thain uba dei ruh u nongialam liangpyrshah u bah Ronnie V Lyngdoh ula ong ba ka kmie ka donkam ban pynbiang ia ki khun naduh ba ka pun ha kpoh khnang ba ki khun kiba kha kin long kiba koit kiba khiah.
Ki kpa kiba iarap ia ka kmie ban kynoi khun, hap khusnam, ong ka kong Ampareen
