Shillong: U Myntri ka tnad ialehkai ka jylla u bah Shakliar Wajri mynta ka 31 tarik Naitung 2024, u la leit jurip ia ka JN Stadium, ha Polo kaban sa pyllong ia ka jingialehkai 133rd Indian Oil Durand Cup.
Ka jingiakhun jong kane ka lympung kan long ha ka 2 tarik hapdeng ka Shillong Lajong FC pyrshah ia ka ka Tribhuvan Army FC ha ka por 4baje janmiet.
Nalor kitei ar tylli ki Football Club, ar tylli kiwei pat kiba don lang ha ka Group F ki kynthup ia ka Goa FC bad Hyderabad FC.
Ha ka jingjurip u myntri, la synran lang ki ophisar ka tnad ialehkai, ki nongïalam ka Meghalaya Football Association, kiba mihkhmat ia ka Durand Cup Organizing Committee nalor kiwei.
U myntri u la ong ba ka jingpynkhreh ka la ïaid shaid shaid bad kiba sah ki long sa tang malu mala ban pynbit pynbiang.
U la ong ba ka Jylla Meghalaya ka dei ka kaba ieid phutbol bad la khmih lynti ba ka jingwan kane ka lympung kan ai mynsiem shuh ia ki paidbah bad khamtam ia ki nongialehkai ha kaba ka sorkar kan iai bteng ban ai ka jingkyrshan.
Lap u myntri ba la biang ka jingpynkhreh ia ka Durand Cup ha JN Stadium, Polo
