Shillong: Ka Subroto Cup International Football Tournament kan sdang ia ka 63rd Edition ha kaba kin don 111 tylli ki kynhun kynthup ki khynnah shynrang, kynthei bad ki khynnah rit.
Kane ka jinglehkai la buh ban pynlong ha kylleng ki jaka ha New Delhi NCR bad ha Bengaluru naduh ka 5 tarik Nailar haduh 11 tarik Nailar.
Kin don haduh 200 tylli ki jinglehkai phutbol ba la pynbeit na bynta kane ka lympung.
Ia kane la pynbna paidbah ha Akash Officer’s Mess ha ryngkat ka jingdon lang u Air Marshal RK Anand VSM, Air Officer-in-Charge Administration & Vice Chairman ka Subroto Mukerjee Sports Education Society (SMSES), uban plie ia kane ka lympung kum u kongsan.
Ia ka Subroto Cup ba la pdiang da ka Subroto Mukerjee Sports Education Society ryngkat ka jingkykrshan lang da ka Air Force Sports Control Board, la pynlong nyngkong ha u snem 1960.
Ia kane ka jinglehkai yn sdang ha ka 5 tarik Nailar da ka jingiakhun hapdeng ki kkynthei kiba hap hapoh ka U-17 ha New Delhi NCR bad ia ki U-15 shynrang yn sdang ha Bengaluru naduh ka 19 tarik Nailar bad ia ka phainal yn pynlong ha ka 2 tarik September ha New Delhi NCR.
Haba kren ha ka jingialang u Air Marshal R.K. Anand VSM, Air Officer-in-Charge Administration & Vice Chairman ka SMSES, ula ongn ba ka 63rd Subroto Cup kan long ka jingsahkynmaw namar ba bun ki kynhun lehkai kin iashim bynta ha kane ka lympung.
Ka Indian Air Force bad ka SMSES ki la pyntikna ba kin pynlong ia kane ka lympung kaba heh bad kaban nang kiew man u snem, khnang ban long ka rynsan kaban plie lad ia ki khynnah ba kin jam sha uwei pat u mawmer ha ka jingim jong ki.
Ha kajuh ka por, ula ai khublei ia baroh ki kynhun kiba la ioh rung ha kane ka lympung lehkai bad u la kitbok kit rwiang ia ki ha ki jinglehkai.
Ia ki nongialehkai ba tbit tam na ki kynthei bad shynrang ha ka U -17 kin ioh ban lehkai sha ka Indian Football Centre ha Austria/Germany.