Shillong: U Lat thymmai ka jylla Meghalaya, u Chandrashekhar H Vijayashankar u la ong ba u la ioh sngew ba ka Shillong ka dei ka nongbah kaba khuid bad dei ban pynneh ia kane ka jingkhuid bad ka jingkhuid ka dei kawei ka mat ba kongsan.
Haba kren sha ki lad pathai khubor mynta ka sngi 30 tarik Naitung 2024, hadien ba la shimti kum u Lat, u Vijayashankar u la ong ba ka jylla Meghalaya ka dei kaba suk kaba sain, bad u pdiang sngewbha ruh ia ki paidbah ban iatei na bynta ka jylla. U la ong ba u shim ia ka jingshaniah ia baroh bad, ka roi ka san kan dei kaba kongsan eh ia u. U la ong ruh ba um don hangne kum Lat na bynta ka kam shimet jongno jongno hynrei ka President ka ri bad u Myntri Rangbahduh ka ri ki phah ia u kum u Lat ban shakri ia ki paidbah ka jylla Meghalaya.
U la ong ba u angnud ba baroh ym tang ki babu sorkar, ne ka sorkar hynrei khamtam ia ki paidbah ka Meghalaya ba kin kynmaw ia u kum uba bha, uba khuid bad uba kitkhia ia ki kam pynroi ynda u la mih na kane ka jylla.
Kum u Lat ba thymmai ka jylla, u la ong ba u tip bad sngewthuh ia ki mat jong kane ka thain bad dei ban pynbeit ia ki, ban ai ia ka jingbishar hok ia ki paidbah.
Ha kajuh ka por, u la ong ba ka jylla Meghalaya ka iasyriem kum ka jylla jong u, kaba dap da ki khlaw bad ki dieng bad kum u Lat ka mat kaba kongsan eh ia u, ka long ka roi ka san, bad un pynsngew sha ki myntri ka sorkar pdeng halor kane.
U la ong ba um shym la kyrpad iano iano ban thung ia u kum u Lat hynrei u shu ioh ia ka jingpyntip kaba kyndit lyngba ka phone na u Myntri Rangbahduh ka ri, u Narendra Modi, ba un thung ia u kum u Lat ka Meghalaya.
U la ong ba u tip bha ia ka ïing jong u Myntri Rangbah ka jylla u Conrad K Sangma namar ba ha ka por ba u long MP ma u, u kpa jong u Conrad, u Purno A Sangma u dei u Speaker ka Lok Sabha.
Ngam wan hangne na ka bynta ka kam shimet jongno jongno’, ong u Lat thymmai ka Meghalaya
