Shillong: Ka State Co-Ordination of Coal Miners, Dealers and transporters Association, kan pynlong ia ki jingialang paidbah ha ki jaka ba don par dewiong ban dawa na ka sorkar ban bishar biang ia ka Standard Operating Procedure (SOP).
Katkum ka SOP kaba la pynmih ha ka 5 tarik, Lber 2021, tang kiba don jaka 100 hectare ki lah ban ioh license ban tih dewiong hadien ba la pynbiang ia ki jingdonkam.
U bah Reginal Shylla uba dei u dkhot jong kane ka seng, u la ong ba ha kane ka SOP ka sorkar ka buh kyndon ba ki briew kiba kwah ban aplai ia ka lisen dewiong kidei ban don ia ka jaka kaba ym duna ia ka 100 hectare.
Hapoh ka ain MMRD 1957, la kdew ba kiba aplai ia ka lisen ki dei ban don ia ka jaka kaba ym duna ia ka 4 hectar hajrong. Ula ong ba kane jingbuh ka sorkar ha ka SOP ba dei ban don jaka 100 hectare, ka long ban leh jubor ban khnieh ia ka hok bad ka kamai ki paidbah bad ka ailad tang ia ki katto katne.
Haba iadei bad kane ka SOP, ula ong ba ka seng ka la ujor ha Iing Kashari jong ka Meghalaya High Court.
Ula ong ba ka seng ka la dep phah jingthoh sha u Myntri Rangbah ka jylla ban kyntu ia ka sorkar ban weng noh ia ka 100 hectar bad ban pynkylla ia ki SOP. Bad lada ka sorkar kam lah ban pynduna ia ka 100 hectar, ka sorkar kadei ban thung da ki Expert Committee kiban wad bniah ha kiwei ki jylla kum Nagaland Assam kiba pyntrei ia u dewiong.
Ula ong ba ha Assam bad Nagaland ka kam tih dewiong, kim lonng beain hynrei ha kane ka jylla ka jingtih dewiong ka long kaba beain.
U bah Reginal ula ong ba ka seng ka la phah jingthoh ruh sha baroh lai ngut ki MP ka jylla ba kin buddien bad ka sorkar India na bynta ban wad ia ki lad ki lynti.
Dawa pynkylla ki trai, nongkhaïi bad ki nongshalan dewiong ia ka SOP 2021
