Shillong: U MP ka Shillong u Dr. Ricky Andrew J Syngkon ula thoh shithi sha u Vice chancellor ka skulbah North Eastern Hills University (NEHU) ban ujor halor ka jingshah kyntait ki samla kiba la biang ka kyrdan ban ioh kam hikai ha NEHU.
Ha ka shithi kaba la phah ha ka 22 tarik Naitung 2024, u Dr. Ricky u la ong ba ia ka NEHU la wanrah na bynta ban ai ia ka jingshakri ia ki paidbah riewlum ka thain shatei lammihngi ka India bad mynta ia ka jylla Meghalaya namar ba kiwei ki jylla kila ioh ia la kajong ka skulbah.
Halor kane, u MP ka Shillong ula kyntu ia u Vice chancellor ban pynthikna ba ka jingthungkam hapoh kane ka skulbah ha ki kam bym dei nonghikai, dei ban pyniaid hi ka NEHU khlem da donkam ban pyniaid da kiwei ki tnad ka sorkar pdeng kumba leh kiwei ki jaka pule ha kane ka jylla.
Ula dawa ruh ba ia ki kam dei ban mang kyrpang ia ki trai shnong ka Meghalaya, bad ula kyntu ba dei ban bud ia ki ain ki rule ka skulbah, khlem da shah pyniaid ha uno uno u riew shimet.
Ha kajuh ka por, u Dr. Ricky ula ong ba ula ioh jingtip ba ki don ki samla trai shnong kiba kyrpad ban shim wai ia ki dukan, hynrei haduh mynta ka bor pyniaid ka NEHU kam shym la pynbeit satia bad ula kyntu ia u vice Chancellor ban pynbeit ia kane ka kam.
Pynher shithi u MP sha u VC ka NEHU ban thep kam ia ki trai jylla
