Shillong: U president ka KSU, u Bah Lambokstarwell Marngar u la ong ba ka Meghalaya Residents Safety and Security Act, (MRSSA) 2016 ka la dei ka aiñ naduh 2016 kaba la mynjur ka sorkar ban pyntreikam ia ka jingwan rung kyrthep ki briew nabar sha kane ka jylla.
Ka jingialang ha ka 24 tarik Naitung 2024, ka la iathir ba katba ka sorkar ka dang ap ia ka Inner Line Permit (ILP), ki sengbhalang kin iarap ban pyntreikam ia ka Meghalaya Residents Safety and Security Act, (MRSSA) 2016.
U President ka KSU u la ong ba ha ka por ba ka KSU ka iakynduh dang shen ia u Myntri Rangbah, u ong ba ka sorkar ka dang eksamin ia ka MRSSA katba ha ka jingkren sha ki lad pathai khubor, u ong ba ka la pyntreikam ia ka MRSSA, bad ym lah sngewthuh ha kano kano ka rukom ka jingkren jong u.
U la ong ba katba ka sorkar ka dang eksamin, ki sengbhalang kin bteng khynra beit ia ki briew kiba wan rung beain khlem ki kot ki sla.
U Bah Dundee C Khongsit u president ka FKJGP u la ong ba ka jingkheiñsting jong ka Sorkar ka pynlong ia ki sengbhalang tied biang ia ka jingkhang ka Sorkar.
Ha ngi u ong dang eksamin, ha ki lad pathai khubor u ong la pyntreikam: KSU
