Shillong: U President ka seng Voice of the People Party (VPP) u bah Ardent Miller Basaiawmoit ula ong ba ka la don ka jingthrang na ki nongialam na rilum Garo kiba pyniar ia ka seng bad wat ban iakhun ha ka elekshon shiteng samoi ruh na Gambegre.
Haba kren mynta ka sngi, u bah Ardent u la ong ba ka party kam kwah ban leh kyrkieh hynrei un sa leit jngoh shwa ha kine ki sngi ban wan ban iasyllok bad ki riew rangbah ha katei ka thain.
“Ki don ki briew kiba thrang na Garo Hills kiba kwah da ka lynti kaba beit bad kiba kwah ban ai tiket hynrei ngim kwah ban leh kyrkieh namar ngi kwah kumba long ha Khasi Hils, ki briew ki kyrshan ia ngi ym da kaba shongshit. Ha ka jingshisha nga mut leit ha une u bnai sha Garo Hills hynrei dang don ki kam ba kyrkieh”, la ong u bah Ardent.
U la ong ba lada ioh ka por kaba kham kylluid, lah ban pyrkhat ia ka MDC elekshon ha Garo Hills hynrei ka party ka don ka jingpynkhreh na bynta ka elekshon MLA ha 2028.
Ha kajuh ka por, u la ong ba ki la don ruh ki nongialam na kiwei ki jylla ka North East kiba la pynpaw ia ka jingsngew donkam ia ka nongrim ka VPP ha ki jylla jongki kynthup ha Mizoram, Tripura, Assam ruh ba ki riewlum ki donkam ban iatylli ban ieng kawei ka nongrim.
U bah Ardent u la ong ba ula ioh ruh ban iakren ia ki katto katne ki MP na North East ha ka por ba u leit sha Delhi ban don ka sur kaba khlain.
“Ha ka jingshisha, la don ruh kiba pynsngew ia ka nongrim ka VPP ha kiwei ki jylla kane ka North East kum na Tripura, Mizoram, ha Assam, jong ki paid riewlum kiba kwah ban kynduh, ki don ka jingsngew ban ieng kawei ban iada ia ka jinglong kyrpang jong ngi”, u la ong.
Ula ong ba ula iakynduh ia ki MP riewlum na NE ha kaba la pynsngew ia ka jingdonkam kawei ka sur kum ki riewlum.
Sha rilum Garo pynkhreh pyier thapniang ka VPP
