Shillong: Ka Hynniewtrep Achick National Movement (HANM), ka la leit ban pynsngew hakhmat ka DGP, Kong Idashisha Nongrang ïa shibun ki mat kiba kynthup ïa ka jingioh rung laitlan ki nong Bangladesh hapoh u pud u sam ka Ri Khasi, bad ruh halor ha jingjyllei ki kam sniew, naduh ka kam tuh kam thiem namar ka jingkynrei ki nongdih bad nongkhaïi drok.
Na kaliang u President ka HANM, u bah Lamphrang Kharbani ula kyntu ia ka DGP ba ka tnad pulit ka jylla kadei ban khot hajir ïa ki Shipai Border Security Force (BSF) kiba paraha ha ki thaiñ Balat bad Dangar ïa ka jingbymler ka ki Shipai BSF ban bat ïa ki nong Bangladesh kiba wan rungtuh sha Ri India.
U Bah Lamphrang ula kynnoh ba ki don katto katne ki briew ba shong shnong ha kitei ki thaiñ ki kamai spah ban shim 10 hajar uwei u nong Bangladesh ban pynrung tuh sha u pud u sam ka Ri India.
U president ka HANM u la pyntip ba na kaliang ka DGP kala kular ban shim khia ia ki mat ba ka HANM kala kdew.