Shillong: Ka Agency For Sustainable Development Initiatives, KJP Synod Sepngi kan bteng ban pyllong biang ia ka jingiakop mareh mynta ka snem ha ka 3 tarik Nailar 2024 na Polo, Shillong.
Ka khusnam na ka bynta ki nongjop ha ka open category kynthup ia ki shynrang bad kynthei ka dei 50 hajar tyngka ia kiba wan nyngkong, 30 hajar tyngka ia kiba wan baar bad 20 hajar tyngka ia kiba wan ba lai.
Ka AFSDI ka KJP Sepngi ka la pyllong ia kane ka jingiakop mareh kaba ai kyrteng ka Shillong Run 10 KM naduh u snem 2011, ban pynsngewthuh ia ki jingeh bad ia ka jinglong ryngkat dor ki briew ba don jingduna ki dkhot met bad ruh ban pynmih pisa ia ki project kiba ka Synnod ka la seng na ka bynta ki khynnah kiba don ki jingduna ha ki dkhot met, ka Mairang Vidyajyoti Inclusive Secondary School, Mairang, Community Based Rehabilitation Centre, Mairang bad ka Rev. Amirkha school for Disabled, Mawlai.
Haba kren sha ki lad pathai khubor mynta ka sngi, u Pastor Bidonbok Syiem u Convener ka Facility & Operation Committee ka Shillong Run 10 KM u la ong ba kane ka Shillong Run yn wan iashim bynta naduh ki khynnah rit, ki samla, ki rangbah bad kiba la kham san ka rta bad ki briew kiba duna dkhot met.