Shillong: Ka Hima Nongkhlaw mynta ka sngi Balang, ka la plie paidbah ia ka Tirot Sing Syiem Museum and Cultural Centre of Indigenous Knowledge, kaba la pyntrei da ka Tnad Arts & Culture ka Sorkar Jylla ha Nongkhlaw.
Ka Hima Nongkhlaw ka dap 500 snem mynta u 2024 bad ka kynjoh sha ka 195 snem naduh ba la shah hiar thma ha ka sorkar Bilat ha u snem 1829.
Mynta ka sngi ka dei ka sngi kynmaw burom ia u Syiem Tirot Sing Syiem uba la khlad noh na kane ka pyrthei 189 snem mynshwa.
Ia kane ka Tirot Sing Syiem Museum and Cultural Centre of Indigenous Knowledge la plie paidbah u Myntri ka Tnad Arts & Culture ka Jylla Bah Paul Lyngdoh kum u kongsan ha ka jingiadonlang u MLA ka Mairang Bah Metbah Lyngdoh, u Principal Secretary ka Tnad Arts & Culture Bah FR Kharkongor, u Syiem ka Hima Nongkhlaw Bah PM Syiemlie, u bah FM Dopth u Secretary ka Arts and Culture, u Dikki D Shirra, Director Arts and culture bad kiwei.
Kane ka Tirot Sing Syiem Museum and Cultural Centre la pyntrei ha ka jinglut kaba kot T.2.5 klur bad ia ka pisa la bei da ka Ministry of Tribal Affairs ka Sorkar Pdeng.
Hapoh kane ka Museum ki don shibun ki khana shaphang u Tirot Sing, ki tiar ialeh thma, ki tiar sahnam ba u pyndonkam ha ka por ba iakhun thma pyrshah ia ki shipai Bilat nalor ki khana shaphang ka Hima Nongkhlaw bad ka jingthmu synshar jubor ka Ri Bilat kynthup ia ka jingthmu ban shna ia ka surok sha Dhaka.
Kane ka Museum & Cultural Centre kan long ruh ka jaka ka ban ai shibun ki jingtip ia ki nongwad bniah shaphang u Tirot Sing Syiem, kiba kwah ban tih jylliew shuh shuh ia ka jingim ka jong u.
Dap ka Hima Nongkhlaw 500 snem, ieng ka Tirot Sing Museum hadien 195 snem ba shah hiar thma
