Shillong: Kumba7 ngut ki nongialam ka Khasi Students Union (KSU) Mihngi circle kila shah khot hajir ha ki pulit ka Sardar Police Station mynta ka sngi halor ka jingleit talasi nongbylla bar jylla dang shen ha madan Polo, Shillong.
Haba kren mynta ka sngi, ki nongialam ka KSU Mihngi kynthup u samla Colford Khriem bad samla Raymond Kharjana kila ong ba kane ka jingleh ki pulit kam mut ba ki tieng hynrei kin iai bteng ban khynra beit ia ki briew kiba wan nabar khlem ki kot ki sla.
Ki la ong ba kaba sngew lyngngoh ka long ba ki pulit ha jaka ban khot hajir bad ban kem ia ki kontraktor kiba wanrah nongtrei bar jylla khlem bud ia ka ain, ki khot hajir pynban ia ki dkhot ka KSU kiba iarap ia ka sorkar ban pyntreikam lem ia ka ain.
Kila buh jingkylli ruh ia ka tnad Labour kaba shu long tang ka nongpeitkai halor kane ka kam wat haba ka ain ka la don ba ki kontraktor ne ki nongwanrah nongbylla ki dei ban bud thik.
Dei Ban khot Hajir ia ki Contractor Kiba pynkhein Ain: KSU
