Shillong: Ka iew sohtrun kaba ar jong ka Meghalaya ha nongbah Delhi ka la kut noh mynta ka sngi ha Dilli Haat.
U myntri rangbah ka Meghalaya u Conrad K Sangma u la sakhi lang ha kane ka sngi kut, ha kaba u la leit ban jngoh ia kane ka iew bad iakynduh ia ki nongrep na kane ka jylla. U myntri rangbah ula pyntip ba ka sorkar ka la theh pisa T. 5.63 klur ban pynbiang ia ki jingdonkam bad T. 1.39 klur kum ka bai seng ha kaba T. 78 lak la pynlut beit thik tang na bynta ka sohtrun ha 2023.
Haduh mynta ka jylla Meghalaya ka la shalan sohtrun 4.36 Metric Ton sha ka Lulu Group Abu Dhabi. Kumba 300 Metric Ton la shalan sha ki ri Europe hadien ba la pynneh slem ia ka ha PRIME Hub ha Ri Bhoi District.
Katkum ka jingong u myntri rangbah, lyngba kane ka sienjam ba la leh ka sorkar, ka la kyntiew ia ka jingkamai ki nongrep sha ka 30-122 percent bad kumba 300 ngut ki nongrep sohtrun kila ioh jingmyntoi sak bad kumba 5000 ngut kiba la ioh jingmyntoi da kawei pat ka lynti.
Ki don 11 tylli ki Collective Marketing Centres (CMC) bad 338 tylli ki Integrated Village Cooperative Societies (IVCS) bad 28 tylli ki Organic Farmer Producer Organizations (FPOs) la seng.
Shuh shuh ula iathuh ba ka sorkar ka la kyrshan pisa bai seng khlem sut sha ki nongrep kumba T. 78.82 Lak ha u snem 2023-24.
Ha kane ka iew sohtrun kaba san sngi ka la sakhi ia ka jingwan tuid ki nongwan thied ia ka sohtrun kaba pynmih na Meghalaya ryngkat ka jingtem jingput lyngba ka Meghalaya Grassroot Music Project (MGMP).
Ka Meghalaya ka shalan sohtrun 9-10 ton tang ha ka iew sohtrun ha 2024.
Kumba 9-10 ton iaid iew ka sohtrun na Meghalaya ha iew Delhi
