Shillong: Ka Joint Action Committee jong ki Sankur Sankpoh ka Raid Nongkhrah kaba la long ha ka 22 tarik u bnai Jylliew ka la jied biang ia u bah Rodney Syngkli kum u Pator ka Raid Nongkhrah bad ka jingialang ka la weng noh ia lai ngut ki longsan kynthup u bah La Lyngdoh, u Phis Nonglong bad Bilshon Nongkoum halor ki kam leh donbor ban ai wai ia jaka jong ka Raid kaba pyrshah ia ki riti dustur treikam ka Raid.
Ha ka jingiakren bad u Nongthoh khubor u Pator Rodney Syngkli ula kynnoh ba kitei ki longsan lai ngut ki la leh buit tuh ban ai wai ia ka jaka ka Raid ba la tip kum u Lum Narphnow bad buh ia ka Green Hills Resturant kaba dei trai da u bah Kyrmen Syngkli khlem ka jingtip ka dorbar Raid bad u Pator.
Ula iathuh ki la leh ia katei ka kam buituh ryngkat ka jingiasylla lang bad u Sirdar Nongpoh, u rangbah shnong ka Umrangksai ban ioh knieh ia ka jaka jong ka Raid Nongkrah da kaba plie ia ka iew rud surok ne Lay Bye Market ha Umrangksai khlem da ioh jingbit ne mynjur ka dorbar Raid.
U la ong ba kitei ki longsan ki la bam klop ka pisa bai jaka shna surok Fourlane ba T.8,70,000 kaba dei jong ka Raid bad ula buh jingkyli shaei ki buh ia katei ka pisa bad kine ki jingleh ki wanrah ka jingkulmar hapoh ka Raid bad ki jingiashun hapdeng ki kur Syngkli bad kiwei ki kur.
U Bah Syngkli ula iathuh ruh kitei ki longsan kim ju khot meeting ia u Pator naduh ba la jied ha u snem 2017 haduh mynta. Kumta ka JAC ka la rai bad weng noh ia ka kyrdan longsan jong ki hapoh ka raid, bad ka la thung ia 3 ngut ki longsan ba thymmai, kata u Bob Lyngdoh kum u Longsan ha ka jaka u La Lyngdoh bad u Mos Lyngdoh kum Asstt Lyngdoh, u Mathias Thangkhiew ha ka jaka u Phis Lyngdoh bad u Jrill Nongkoum ha jaka u Bilshon Nongkoum.
Ka jingialang ka rai ban khang shwa noh ia ka Green Hills Restaurant bad ia ka Lay bye Market ha shnong Umryngksai, namar ka jingleh donbor u Sirdar Nongpoh bad ki katto katne ngut ki rangbah khlem ka jingtip kiba bun balang bad ka dorbar Raid Nongkhrah.