Shillong: U MP ka Shillong Parliamentary konstitwensi u Dr. Ricky Andrew J Syngkon u la iashim bynta ban kren hapoh ka Parliament mynta ka sngi, halor ka phang, ka Motion of Thank halor ka jingkren ka President ka ri, ka Droupadi Murmur.
Haba shim bynta ban kren ha kane ka phang, u Dr. Ricky u la pynsngew ia ka jingeh jong ki paidbah ka jylla khamtam kiba sah ha khappud bad ka Assam bad kumjuh ha Bangladesh, ha kaba ki im hapdeng ka jingsyier bad ka khyndew ka shyiap kila shah knieh na ka jingbym ler ki sorkar barim da ki phew snem.
U la ong ba la bun snem la dawa ban pynrung ia ka ktien Khasi ha ka khyrnit ba phra kaba dang sahteng haduh mynta. U la ong ba u ioh sngew ia kiwei ki paralok MP ki kren da ka ktien lajong bad ma u ruh, u thrang ba ha kawei ka sngi shen, un ioh ban kren da ka ktien Khasi hapoh Parliament hadien ba la pynrung ha ka khyrnit ba phra.
Kawei pat kaba u kren ka long ban kyntiew ia ka kam jngohkai da kaba wanrah ia ki jaka dem jong ki liengsuin kiba heh ban pynsuk ia ka leit ka wan jong ki nongwankai. Ula pynsngew ruh ia ki jaka ialeh eksamin ia ka CUET ban pynsuk ia ki samla pule ha ka jylla.
Hapoh Parliament, ong u Dr. Ricky, “Nga thrang ban ioh ban kren da ka ktien Khasi”
