Shillong: Ka kynhun seng na Garo Hills ka la phah jingthoh sha u myntri rangbah ka jylla u Conrad K Sangma, ban pyrshah jur ia ka jingpynkhreh ka sorkar ban kit noh ia ki shrieh Gibbon na jaka pyllait im ka Sonji Wildlife rescue Centre, kaba jngai 40 km na Tura, West Garo Hills, ha rilum Garo sha Zoo ha Umtrew, Ri-Bhoi.
U General secretary ka AOSW Nongal Bibra Unit u Letchiang Marak ha ka shithi sha u Conrad, u la ong ba kum ki nongshong shnong ka Garo Hills, ki pyrshah jur ia ka jingthmu ban rah noh ia ki shrieh Gibbon na rilum Garo, namar ba kine ki jait shrieh ki dei ki bynta ka mariang, ka kolshor bad ka jingioh pateng hyndai ha katei ka thain. Ki sngew ba ka jingpynkynriah ia ki kan buh ia ka jingma ia kine ki jait mrad, bad kan pynsniew ia ka jinglong ka mariang bad kan pynjah noh ia ka jinglong kyrpang ka thain.
La kyntu ia u myntri rangbah ban pyrkhat biang ia kane ka rai ban ym pynkynriah ia kine ki jait shrieh na katei ka jaka bad kila kyntu ba un khot jingialang ban iakren kham bniah halor kane ka kam.
Lah ban kdew ba ka sorkar ka thmu ban pynkynriah noh iaki sha State Zoo ha Umtrew kaba la ioh jingbit na ka Central Zoo Authority (CZA) ka sorkar India, namar ba katei ka jaka ha Garo ka dei tang ka jaka pynlait im ia ki bad kam dei ka jaka ban pynshong mrad junom kum ka zoo.
Pyrshah ka AOSW ban kit noh ia ki Shrieh na Garo sha Umtrew
