Shillong: Ka sorkar jylla ka la kular ban ai jingkyrshan ia ka jinglut jingsep jong I mei ieid Khmoin Wahlang ba in ioh ban leit iashim bynta ha ka jingiakop mareh kaban long ha Australia lashem bnai.
Kane ka jingkular ka sorkar ka long hadien ba I mei ieid Kmoin ila wan kiew khnang haduh Secretariat mynta ka sngi ban kynduh ia u myntri ka tnad ialehkai ka jylla u bah Shakliar Warjri, bad kumjuh ia u myntri rangbah ka jylla u Conrad K Sangma, ban kyrpad jingiarap na ka sorkar namar ba ka jinglut ka long kaba heh ban leit sha katei ka ri.
La iathuh ba ka jinglut kam duna ia ka 2-3 lak eiei ban leit sha katei ka ri. I Mei ieid Khmoin in mareh ha ka marathon kaba 10 km, 5km, 3km bad 1500 m bad 400 metre.
U myntri ka tnad ialehkai u bah Shakliar Warjri u la ong ba u sngew kmen eh ba ha ka rta jong I, ka la kot sha ka 76 snem, I dang ioh ia ka met ka phad kaba koit ban iashim bynta ha ki jingmareh. U la kyrmen ba kane ka jingiashim bynta jong I, ka long ka nuksa ia ka jylla ba ila wanrah ia ka nam bad ka burom ia ka jylla.
Haba iadei bad kane ka jingkular ka sorkar ban kyrshan, I mei ieid Khmoin ila pynpaw ia ka jingsngewnguh ia ka sorkar khamtam ia u myntri ka tnad ialehkai, bad ia u myntri rangbah ka jylla. Ka jingiarap lem jong ki, ka la iarap ia I ban leit iashim bynta shuh sha kiwei kiwei ki jaka bad ila kyrmen ban jop iaka thong.
Kiba ioh ban leit mihkhmat ia ka Ri India sha ka Marathon sha Australia na ka jylla Meghalaya ki don ar ngut ki longkmie, kong Kmoin Wahlang na Shngimawlein, South west Khasi Hills District bad ka kong Wandashisha Dewkhait na Nongsder ka Ri bhoi District.
I mei ieid Khmoin, mynta ka kynti, in leit ban iashim bynta ha ka jingiakop mareh Marathon sha ri Australia, bad in iashim bynta ha ka jingmareh kaba jrong bad kaba lyngkot ruh.
Ki jingiakop mareh ba in iashim bynta kin long kaba 10 kilomtre, 5kilometre, 3kilometre, 1500 metre, bad 400 metre.
I mei ieid Khmoin ila wanrah nam ia ka jylla hadien ba ila jop ruh ha kiba bun ki jingiakop mareh bad watla im dei ka briew kaba riew spah, ka nang kaba stad hynrei ka sap bad ka jingtrei smat jong I kaba la ai kyrpang u Blei, ka kham palat ban ia kiei kiei.
Haba kren mynta ka sngi, I mei ieid Khmoin ila pynpaw ia ka jingsngew kmen ban ioh leit iashim bynta sha katei ka ri kaban iatyngkhuh bad ki nongmareh na kylleng ka pyrthei, bad ila ai nguh ia u Blei uba la plie lad bad ai ka bor ia I haduh kine ki sngi.
I la ai khublei ia u myntri ka tnad ialehkai, ia u myntri rangbah bad kiwei kiba kyrshan bad iarap ia I, ban pynioh ia ka lad ban leit sha katei ka ri wat hapdeng ka jingduk ka jingkyrduh.
Kynduh I mei ieid Khmoin ia u Conrad, bah Shakliar, kular ka sorkar ban kyrshan ban leit sha Australia
