Shillong: Ka Myntri ba khmih ia ka tnat ka Koit ka khiah ka la ong ba hap ban pynkynmaw ia ka Sorkar pdeng ia ka jingdon ka North Eastern Indira Gandhi Regional Institute of Health and Medical Sciences (NEIGRIHMS), hynrei ka bym ioh ban pyndonkam pura.
Ka la ong ba lada dang pynsahteng ia kita ki kyndon treikam ha kum kine ki Skulbah jong ka Sorkar pdeng kan long ka jingduhnong kaba khraw ia ka Jylla, namar bym ioh ban pyndonkam pura.
Ka la ong ba ka NEIGRIHMS kadei kaba don ha kane ka Jylla bad donkam ia ka bhah kyrpang ban iarap ia ki doctor ka Jylla. Ka la ong ba ka bhah ka la don lypa na ka bynta ki Jylla ka thaiñ shatei lam Mihngi, hynrei la donkam ban pynmih shuh ka bhah kyrpang na ka bynta ki doctor ka Jylla ha man la ki department kiba don ha katei ka skulbah.
Ka Myntri ka la ong ba na ka bynta ban ioh ia ka jingmyntoi kaba pura bad paka na ka jingdon ka NEIGRIHMS, kan leit ban iakren bad u Myntri ka Sorkar pdeng sha Delhi, bad pynpaw ka jingkyrmen ba u Myntri um sngap ia ka jingdawa.
Ha kaba iadei bad ka Cancer Institute ba la thmu ban tei ha phyllaw jong ka NEIGRIHMS, ka Myntri ka la ong ba ia kane ruh kan iakren sha Delhi khnang ban pynurlong khnang ban iarap ia ki nongpang bad pyllait na ki jinghap ban leit shah sumar shabar. Ka Dr Ampareen ka la ong ba na ka liang ka Sorkar kan khot lang ruh ia u Director ka NEIGRIHMS ban leit sha Delhi ban pynbeit ia ki jingdonkam ka Jylla na katei ka Skulbah.