Shillong: Ki nongsam khaw reshon hapoh ka East Khasi Hills District mynta ka sngi kila mih jyndat na ka jingialang kaba la pynlong ka Sorkar Jylla ban hikai pyntbit halor ka rukom sam khaw Reshon sha ki paidbah.
Ki nongsam khaw reshon ki la mih jyndat ban pyrshah ia ka jingbym ban lah pynshai ki nonghikai pyntbit iaki jingkylli ki nongsam khaw Rashon bad ban pyni ruh iaka jingpyrshah iaka jingbthah ka Sorkar Jylla ban pyndam daka jingthew E-Scale hala ki dukan sam khaw Rashon.
Haba kren sha ki lad pathai khubor u dkhot ka Fair Price Shop Dealer Association u Bah Danny Langstieh ula iathuh ba kum ki nongsam khaw Rashon kim lah ban pdiang iaka jingbthah ka Sorkar Jylla namar u khaw udei bala wanrah na bar ka Jylla bad tad haduh bala pynpoi shaki dukan, ka jingkhia kilo u khaw ruh kala nang duna namar ka jinglait ei haka por pynkit.
U Bah Danny ula iathuh ba u khaw rashon u ban pynpoi sha ki dukan ban sam shaki paidbah, udei ban don beit iaka 50 kilo hynrei tad haduh ban da poi shaki dukan, u khaw u don beit ka jingduna iaka 50 kilo.
“U Khaw byrni ba ki pynpoi shaki dukan naka kudam, um ju don iaka 50 kilo kumba udei ban don hynrei u don ba poi tang 43 kilo, 44 kilo bad kane kadei namar ka jingpei ki byrni” la kynnoh u Bah Danny.
U Bah Danny ula kyntu iaka Sorkar Jylla ba kadei ban thew shwa ia u khaw byrni hashuwa ban pynpoi shaki dukan ban pynthikna, la u don ne em 50 kilo, ne u duna namar ki nongsam khaw rashon ruh ki hap beit ban sam shaki paidbah katkum ka hok ba kidei ban ioh.
Na ka liang u Bah Richard Khongwir ula ong baka jingtyrwa ka Sorkar ban pyntreikam daka jingthew E-Scale ban sam khaw rashon shaki paidbah ka long kaba biang tam hynrei ka Sorkar kadei ban pynthikna shwa ba u khaw uba poi shaki dukan, udei ban biang kilo.
Ym treh shim ki nongkhaïi khaw ia ka mashin thew ba phah ka sorkar
