Shillong: Ka seng Hynniewtrep Youth Council (HYC) ka la ujor syndon sha ka Meghalaya Lokayukta ban tohkit bad ban pynshitom ia ka Director ka tnad Housing lada lap kaba dei shisha, halor ka jingsam ia ki tin sop ïing sha kiba dei ban ioh, ki long kiba stang bad ki bym biang ka jingthew katkum ka jingrben.
Mynta ka 25 tarik Jylliew 2024, u president ka HYC, u bah Roykupar Synrem u la ong ba kine ki tin kiba sam ka tnad Housing tang shu hap u phria kila dep thliew lut, bad kim iarap eiei ia kiba ioh ia ki.
Ka seng ka la dawa ban tohkit bad ban pynshitom ia kiba donkti, bad dei ruh ban pynphai lut ia baroh kiba la phah sha ki Block namar ba ka jingpynlut haduh 20 klur tyngka ban thied iaki, kan dei ka jingpynsyrwa kai ia ka pisa u paidbah.
Ka HYC ka la ujor ia kane hadien ba kam pdiang ia ka jingkren u myntri ka tnad Housing u Marcuise N Marak uba la ong ba ka tnad ka la thung ia ka jingtohkit hynrei ha kajuh ka por, u la dep ai lypa ia ka rai ba kam don eiei ka jingleh bakla.
U President ka HYC u la ong ba katkum ka jingbthah, ka jingrben ki tin ka dei ban long 45 mm hynrei la wanrah tang kiba rben 25-28 mm.
T.20 klur thied tin sop ïing tang shu hap u phria la pei thliew kdar, ujor noh ka HYC sha ka Lokayukta
