Shillong: Ka ophis jong ka District Sport Officer WKHD mynta ka sngi ka la ïoh ban pynkut noh ïa ka jingïalehkai West Khasi Hills District Level Inter School Subroto Mukherjee Cup Football Tournament 2024 ïa kaba la pynlong ha madan shnong New Nongstoiñ.
Ïa katei ka lympung jingïalehkai kaba la sdang naduh ka 13 tarik u bnai Jylliew 2024 kaba la ïoh ban pynhap pyrda noh ha ka 24 tarik u Jylliew 2024 la wan ban sakhi lang da ka Ela Begum Lashkar DSEO WKHD kum ka kongsan.
Ki skul kiba la ïoh ban poi shaduh katei ka jingïalehkai kaba khaduh ki kynthup ïa ka Sibsingh Memorial Government Higher Secondary School pyrshah ïa ka Kyrshai Government LP & Upper Primary School na ka thup ki kyrdan hapoh ka 17 snem ka rta jong ki Kynthei, ka Dapboklang Giri Secondary School Porla pyrshah ïa ka Sibsingh Memorial Government Higher Secondary School na ka thup ki kyrdan hapoh ka 17 snem ka rta jong ki Shynrang bad ha ka ka thup jong ka kyrdan kiba hapoh ka 15 snem k rta jong ki Shynrang kadei ka St. Anthony’s Secondary School Jaidoh kaba la ïakynduh pyrshah ïa ka Dapboklang Giri Memerial Secondary School.
Ïa ka nam lahduh ha ka thup jong ki khynnah kiba dang hapoh ka 15 snem ka rta jong ki Shynrang la ïoh ban rah da ka Dapboklang Giri Memerial Secondary School Porla.
Haba phai pat ha ka thup jong ki kynthei kiba dang hapoh ka 17 snem ka rta ka Kyrshai Government LP & Upper Primary School na ka thaiñ Rambrai ka la rah ïa ka nam lahduh katba na ka liang ki shynrang ka Sibsingh Memorial Government Higher Secondary School ka la bat biang kum ka lahduh kaba la kot ruh haduh 3 sien kyntih, lynter naduh u snem 2022 – 2023 bad 2024.
Shuh shuh ha katei ka sngi ïa ka nam Best players ha ki under 17 ki kynthei la ioh ban khur da ka Esha Nongum na ka Kyrshai Government LP& UP School.
Ha ki under 17 ki shynrang la khur da u Firstly John Ïawren na ka Donbosco Secondary School Mawkhlam , katba ha ki under 15 ki shynrang ia kane ka juh ka nam la ioh ban khur da u īohborlang Lyngkhoi na ka Dapboklang Giri Memorial Government Secondary School.
Lai sien lynter rah ka Sib Singh HSS ïa ka Subroto Cup ha WKH
