SHILLONG: U myntri ka tnad jngohkai ka jylla u bah Paul Lyngdoh u la ong ba ka jaitbynriew Khasi ka dang sdang ban iaksaid kumba 183 snem naduh ba wan ka thoh ka tar hynrei hapdeng ka por kaba dang lyngkot, pynban ka la paw bad la mih bun ki riew khraw ha ka duriaw India.
Haba kren ha ka jingpynkup burom ka Seiñ Jaintia ryngkat ka Women Wing, Shillong ia ka kong Silbi Passah bad ka heprit Mansa Najiar, mynta ka 22 tarik Jylliew 2024, ha Qualapaty, Shillong, u bah Paul u la ong ba ka jaitbynriew Khasi kaba don kumba 2 million ne 20 lak ngut ki nongshong shnong, ka la pynmih bun ki riew khraw kum u bah James M Lyngdoh u Chief Election Commissioner ka India, nangta ka chairperson ka UPSC, kumjuh ki Ambassador, u kyrtong ba iakhun ia ka shuki President ruh nalor kiwei.
Ha kajuh ka por, u la ong ba ka jinglong kyrpang ka jaitbynriew ka long ba ka don ka jingskhem ha ka jingiadei ha ka imlang sahlang, ban iamih ban pynshngain haba don ka iap ka duh bad kumjuh ha khawai dawai.
U la ai burom ia Ka kong Silbi Passah kaba la long ka nonghikai ia u mynshwa bad kumjuh ia ka heprit Mansa ba kin nang irat ha ka jingim jongki.
Ka Sein Jaintia, Shillong ka la pynkup burom ia ka kong Silbi Pasah kaba la ioh ia ka khusnam Padmashri na ka President ka ri bad ia i hep rit Mansa Najiar kiba ioh ia ka nam Young Author 2023.
Ka jaitbynriew Khasi ka dang paw pyrthei 183 snem hynrei ka la mih bun ki sohpyni
