SHILLONG: Ka jingiakhih ka Joint Action Committee (JAC) ka Hima Sohiong ban leit jynrat wat ia ka gate ka KHADC ha ki snem ba la leit, ka la mih soh mynta ka kynti.
Ka KHADC ka la weng noh syndon ia u Lyngdoh u bah Shemphang Thabah, uba la dawa ka JAC naduh u snem 2019 eiei. Ka hukum na ka KHADC halor kane, ka la mih ha ka 14 tarik mynta u bnai Jylliew 2024, ha kaba la weng ia u bah Shemphang na ka shuki Lyngdoh.
U nongialam ka JAC u bah Purningstar Shabong haba kren mynta ka 21 tarik Jylliew 2024, u la ong ba ka JAC ka la pynpaw iaka jingsngew kmen ba ka KHADC kala shim khia ia kane ka sienjam hadien ka jingiakhih kaba la kham slem. U bah Purningstar u la ong ba hapdeng kane ka jingiakhih kaba la sdang naduh u snem 2019, la don ruh bun ki dkhot ka JAC kiba la shah pynngat kyndon ain, shah kren bein, shah kyntboh ha kane ka jingiakhun hynrei ha kaba khadduh ka la ioh ia u soh.
Ha kajuh ka por, ka JAC ka kyrpad ia ka KHADC ban pynsted ban pyllong ia ka jingjied ia u Lyngdoh ka Hima Sohiong. Mynshwa ka rukom jied ia u Lyngdoh ka dei lyngba ki Khun ki Hajar hynrei dang shen la jied tang ki saw Lyngdoh, kumta, ka JAC ka la dawa ba dei ban ailad biang kumba leh mynshwa ban jied ki paidbah.
Mih soh ka jingleit jynrat khyrdop ka JAC Sohiong ha KHADC, shah weng u Lyngdoh
