SHILLONG: U MP ka Rajya Sabha na Meghalaya, u Dr. Wanwei Roy Kharlukhi u la ong ba lada lap ba u pyntreikam hi ia ka MP skhim, un risain noh mardor na ka kam MP hi.
U Dr. Wanwei uba la ujor ejahar ia kawei ka YouTube shimet kaba kynnoh bamsap ia u, u la ong mynta ka sngi 20 tarik Jylliew 2024, ba u la iaid 40 snem ha ka sain pyrthei, u la pyrshang ban im beit ban iaid beit, bad lada don ka jingkynnoh ba u bam pisa, un thoh hi ma u sha ka CBI ban wan tohkit bad lada ka lap bym dei, kiba kynnoh kin hap siew bai mynrain khmat.
U la ong ba ia ka MP skhim jong u, la pyllait lut 2022-23 lait noh tang ki bym pat phah ia ki utilisation certificate, bad ka jingpyntreikam ia ka MP skhim ka long ba u la ai beit ha ki skul, ki shnong, ki hospital bad kum u MP u shu phah sha u DC katba ka jingpyntreikam, la leh hi kiba ioh ia ka skhim.
Hynrei ha u snem 2023-24, la don ka jingpynkylla ia ka rukom pyniaid ia ka skhim, ha jaka ban phah sha ki tnad sorkar pdeng, la phah beit sak na Parliament sha baroh ki DC ter ter sha ki BDO.
Ha kawei ka liang, u MP ka Rajya Sabha ula ong ba hapoh Parliament kam long kaba jem ban kren bad ban leh eiei, marwei khlem ka kynhun.
Haba kylli halor ka jingjop ka VPP ha kane ka elekshon MP sha ka Lok Sabha, u Dr. Wanwei ula kitbok kumba la jied u paidbah.
U la ong ba ka politik ha Delhi, u la kyrshan tyngeh ia ka jingmut jong u Purno A Sangma ban don kawei ka seng kaba khlain ban don bun ngut ki MP na North East ha Parliament, khnang ban lah ban pynsngew ia ka sur ki paidbah ka thain.
U la ong ba la kumno kumno 15 ngut ki MP dei ban jop na North East ban ktik ia ka politik ha Delhi hynrei lada ym don bun ngut ki MP ha Parliament, klet shwa ia ka jingphoh sniew eiei. Ha kajuh ka por, u la ong ba ka jingjop elekshon MP ka Voice of the People Party (VPP), ka dei namar ka jingpynkhih ia ka Reservation Policy, kaba lah ban wanrah ka jingma pat hadien.
U Dr. Wanwei ula kyntait ba ka dei na ka jingkyrshan ka BJP, kaba la pyntroin ia ki kyrtong ka NPP.
Katkum ka jingong u Dr. Wanbei, ka daw ka jingshah rem ki kyrtong ka NPP ka dei namar ba ka Voice of the People Party kala pynkhih ia ka Reservation Policy haduh ba ka la pyllong ia ki paidbah Khasi bad Jaintia ban kyndeh mynsiem, katba ki paidbah na Garo Hills kila sngew ba ka dei ka jingsyier ia ki bad kane ka la ktah ia ka NPP ha kane ka elekshon MP ha Khasi-Jaintia bad kumjuh sha rilum Garo.
Hynrei ha kajuh ka por, ula ong ba lada ba ka dei shisha ba jop na ka jingkhuid ka politik ne clean politic, un sngew kmen eh haduh katta katta.
Lada lap nga pyntreikam ia ka MP skhim, ngan iehnoh ia kam MP mynta: Dr. Wanwei
