SHILLONG: La don kiba pynpaw ia ki sngew bynniaw ba naduh bym long MLA, MDC shuh u bah Process T Sawkmie, ym ju kham ioh shuh ia ki tiar ialehkai kiba ju ai sha ki Club, ki kynhun bapher bapher ha Mawlai.
U Secretary ka Lawei ka ri, bah A. Khyriem ha ka 18 tarik u Jylliew, 2024 u la pynpaw ba ha ka por ba dang long MLA u bah Process T Sawkmie, ki seng samla, ki sports club bad ki kynhun bapher bapher ki ju ioh jingiarap da ki tiar ialehkai, hynrei la kynjah ka jingioh pdiang ia ki tiar ialehkai.
Ia kane, u bah A Khyriem u la kren ha ka jingplie ia ka jingiakob ialehkai carrom kaba la tip kum 17th Lawei ka ri Open Carrom Championship 2024 kaba la pyniaid ka Lawei Ka Ri Sports Social & Cultural Club ha Indoor Sports Hall, Mawlai Mawdatbaki.
Ha kajuh ka por, u bah Process u la pynpaw sngewkmen ba ka Lawei ka ri ka dang bteng ia ka jingialehkai haduh mynta naduh ba la seng mynshuwa.
U iathuh ruh ba ha ka por jong u ki don ki jingiathong phutbol ba kiba ioh rah ia ka namlahduh ki ioh da u sniang bad kiba wan baar da u sniang, hynrei mynta kine kim don shuh.
Ha kane ka sngi la ia don lang bah G. Lymba, president ka Lawei ka ri, bah D. Khongwir, chairman ka Indoor stadium, Mawlai Mawdatbaki, ki nongshim bynta ha ka iakob carrom bad kiwei kiwei.
Naduh bym long MLA u bah Process ym ju ioh tiar ialehkai shuh ki Club ha Mawlai
