SHILLONG: Uwei u rangbah ula khlad na ka jingshah pom ha u pyrthat katba uwei ula ngam jyllop.
Ia une u rangbah ba khlad khlad naba shah pom pyrthat la tip kum u bah Kantly Maramba na ka shnong Nongkroh, Rambrai kaba hap Nongstoin Block, West Khasi Hills kaba jia ha ka 12 tarik mynta u bnai, katba uwei pat u dei u bah Probino Warbah na shnong Tynring, uba ngam jyllop ha Umrynjah kaba hap ha Mawlai Block, East Khasi Hills kaba la jia ha ka 7 tarik mynta u bnai bad la ioh sei ha ka 10 tarik Jylliew.
Katkum ka kaiphod kaba la pyllait ka sorkar lyngba ka Meghalaya State Disaster Management Authority (MSDMA) ha kine ki hynniew sngi naduh ka 10 tarik haduh 17 tarik Jylliew 2024, ka West Garo Hills ka la shah ktah jur ha kaba 24 tylli ki shnong kila shah ktah bad 2,825 ngut eiei ki briew. Ka East Jaiñtia Hills ka la shah ktah ha ki jaka rep kumba 3.45 hectare bad 107 ngut eiei ki briew.
Ka Eastern West Khasi Hills bad ka South West Khasi Hills ruh kila shahnalor ka West Khasi Hills.
Kiwei pat ki district ba shah ktah ha ki bor ka mariang ki long ka jingshlei um ha West Jaintia Hills bad ha South Garo Hills.
Katkum ka repot ka sorkar haduh 42 tylli ki shnong katba 337 ngut ki briew kila shah ha ki bor ka mariang, kaba khyrwit ha kine ki hynniew sngi kylleng ki jaka ka jylla.
Ki don ruh 18 tylli ki iing sah briew kiba la shah jynrat ha ki bor mariang bad 4.45 hectare ki jaka rep kiba la shah pynjulor nalor ki surok, ki lynti syngkieng bad kiwei ki jingdonkam ba kongsan.
Khlad rangbah ba pom u pyrthat, shah ktah 3 hajar ngut na ki bor mariang
