SHILLONG: Ka MDC na Nongshken kaba dei ruh ka Executive Member hapoh Khasi Hills Autonomous District Council (KHADC) ka la ong ba ka long kaba la pynkhreh lada pynlong noh ia ka election MDC ha kano kano ka por, da kaba kdew ruh ba ka jingpynjlan ia ka samoi treikam ki MDC ba mynta kam dei satia ba ki MDC ki tieng ban leit sha ka election hynrei kadei namar ba don ka jingkyrpad na katto katne ki constituency ban pynbeit thymmai ia ki, ia kaba la ai jingmynjur da u Lat ban leh ia ka kam da ka delimitation committee.
Haba kren mynta ka sngi ka MDC ka la kyntu ia ka Sorkar lyngba ka tnat District Council Affairs (DCA) ban pynkloi noh ia ka election, hadien ba la ioh ia ka kaiphot na ka delimitation committee. Ka la ong ba lada ka election ka long noh mynta mynta ruh kam sheptieng, da kaba bynrap ba ka election ka shong ha ki paidbah ban bishar ym ha kiba iakhun pyrshah. Ka la ong ba kum ka MDC ka la treishitom ha la ka bor ba la ai, bad pynpaw ka jingsngew shaniah ha ki paidbah.
Ha kawei ka liang ka ka la ai ka jingkhublei kitbok ia ki ar ngut ki MP kiba la shah jied thymmai, u Dr Ricky AJ Syngkon na Shillong bad u Saleng A Sangma na Tura, bad pynpaw ka jingkyrmen ba kine ki MP bathymmai kin lah ban rah ia ki mat ka Jylla ha Parliament.
Ym dei ba ngi tieng ban iakhun ia ka election, u paidbah uba dei ban bishar ia ngi: Kong Grace
