SHILLONG: Ha ka por lyiur kumne, ka jingdum lyoh khyndew ha ka surokbah Shillong-Pynursla-Dawki, ka bynta narum Laitlyngkot haduh Pynursla, ka dei ka jaka shong u lyoh khyndew. Kam long kaba suk ban niah kali haba u lyoh u hiar ha khyndew, ha kaba wat ki ding kali, kim lah ban pynpei ban ksam wat ha ka por myn sngi ruh.
Teng teng, ha ka por myn sngi ruh, la I kumba ka dei ha ka por mynmiet namar ba u lyoh uba rben haduh ba ka kjat sngi kam lah ban ksam eiei.
Bun ki kali kiba iaid ki hap ban phikir bha bad iaid suki jai namar ba ka long kaba syier haduh bym lah ban iohi ia ki para kali haduh ban poi hakhmut syndon.
Ki nongniah kali kiba wan nabar, ki mad ia ka jingeh bha ban niah ha ka por dum lyoh ha katei ka thain.
Kawei ruh ka long ba ha linter katei ka surok, kam don ki jingbuh dak na ka PWD kum ki florescent light ne ki jingthaba ban iohi kiba niah kali, bad u lain lieh ruh kiba iarap ia ki nongniah kali, u don ha ki bynta bynta bad bun ba la jah.
U lyoh ba rben skui skui narum Laitlyngkot shaduh Pynursla
