SHILLONG: Ha ka 7 tarik U Jylliew 2024, la pynlong ia ka lympung jingialang ba la tip kum ka high level consultative meeting ha State Convention Centre, Shillong, da ka jingiashim bynta lang jong ki nongmih khmat ka iing dorbar thawain ka jylla ne ki MLA, ki nongmih khmat ka District Council ne ki MDC, bad ki nongmih khmat na ki 76 tylli ki Dorbar Shnongs na ki shnong bapher bapher ba don ha kylleng ka nongbah Shillong.
Kane ka jingialang ka long ban iakren halor ka phang bad ka mat ba kongsan kaba iadei bad ka jingpyndonkam ia ki jingdih pynbuaid ha Meghalaya.
Ka tnad Social Welfare ka jylla, ryngkat ka jingiatreilang bad ka tnad Home (Police) bad ka ophis U Deputy Commissioner ka East Khasi Hills District, ki la shim ia kane ka sienjam kum shi bynta jong ka Drug Reduction Elimination & Action Mission (DREAM) ba la pyllait paidbah ha u bnai Jylliew 2023– kaba long ka mission ne ka thong ban tei bad pynlong ia ka Meghalaya kaba lait na u drug ne " Drug Free Meghalaya'' lyngba ka jingiatreilang bad jingiasnohkti lang jong ka sorkar jylla bad ki bor pyniaid shnong ban pynduh ia ka jingkynrei jong ka jingdih drug ha ka jylla.
Da ka jingsngewthuh ba ka jingdih ne ka jingpyndonkam ia u drug ka buh jingeh bhai a ka imlang sahlang bad kaba yn ym lah ban tehlakam ia ka tang da kawei ka shnat, ka jingthmu ba kongsan jong kane ka lympung jingialang ka long ban wanrah ia ka jingiatreilang jong baroh kumno ban iakhun ia kane ka jingeh ha kaba iadei bad ka jingdih ne jingpyndonkam ia kum kine ki jingdih pynbuaid. Ha kane ka jingialang la ban jur halor ka jingdonkam ban don ki nongialam bad ban ioh ka jingiatreilang ha ki kyrdan bapher bapher. Kane ka jingialang ka long kum ka rynsan na ka bynta baroh kito kiba iadon bynta ha kane ka liang ba kin sngewthuh ia ka jingma ba shyrkhei ha kaba iadei bad ki jingeh kiba mih na ka daw jong ka jingdih bad pyndonkam ia ki jingdih pynbuaid bad ba la donkam kyrkien ban don noh ia ki lad ki lynti kiba biang ba bit kumno ban tehlakam ia kine ki jingeh. Ha kane ka jingialang la iakren ym tang kumno ban thaw ia ki kyndon ain hynrei ban wanrah ia ki lad ki lynti kiba biang ban iada ia ki khynnah samla na ka jingpyndonkam ia kine ki jingdih pynbuiad.
Ha kaba iadei bad kane ka liang, la kyrpad ia ki shnong ba kin buh ia ki jaka ai jingiarap ne ki rehabilitation centre ia kaba yn kyrshan ia ki hapoh jong ka DREAM. U myntri ka tnad Social Welfare ka sorkar Jylla U bah Paul Lyngdoh u la ong ba lyngba kine ki jingialang kiba la long na ka por sha ka por la iohi ba ka long kaba donkam ban phai biang bad ban pynkhie im biang ia ki Village Defence Parties (VDP), khamtam haba peit ba ki shnong kiba don ia kine ki don tang kumba 11 tylli. 11. U myntri u la pynbna ba hapoh kine ki ar taiew, yn sa dang pynlong shuh shuh I aki jingialang ban iakren bad ban pyntikna ia ki sienjam ba katduh ba yn shim. Kine ki jingialang kin pyntikna ba yn sngap ia ki jingpynsngew jong ki shnong ki thaw bad kiei kiba dei ban leh na ka bynta kine ki jingdonkam. Lah ban kdew hangne ba khang ba yn nang kham pynkhlain shuh shuh ka jingiashim bynta jong ki shnong ki thaw, ka sorkar jylla kan wanrah bad pynthymmai biang ia ki kyndon jong ki VDP, da ka jingthmu ban pynlong ia ki shnong ki thaw ba kin sngew longtrai bad don jingkit khlieh. La khmih lynti ba kane ka jingpyrshan kan iarap ban wanrah ka jingsngew long trai bad kan pynshlur ia ka jingiashim bynta jong ki shnong ki thaw.
Hadien ka jingkren jong I Bah Lyngdoh, la don ka jingiamir jingmut ne ka interactive session ha kaba la bun na ki dorbar shnong ki la pynpaw ia ki jingsngew bapher bapher jong ki, bad la don ruh ka jingia kylli jingkylli. Ka la don kawei ka jingai jingmut na I Bah M. Kharkrang, I IPS ba la shnongthait bad kiba long ruh I Rangbah shnong jong ka shnong Riatsamthiah, ha kaba iadei bad ka jingdonkam ban wanrah ia ki ain kiba kham pyrkhing da kaba I la pynpaw ba I la mad ia kane ha ka por ba I dang trei ia ka kam ban pynduh ia ka jingdie tuh ia kai kyiad pyrsi, ki nongiashim bynta ki la ban jur ruh halor ka jingdonkam ban don ka jingiatreilang bad ki bor ka ain kumjuh ruh bad ka
iing shari. Sa kawei pat ka jingtyrwa ka long ba ka long kaba donkam ban ioh ka jingiatreilang bad ki nongsakhi khnang ba ka jingbishar kan long kaba suk. Ki nongiashim bynta ki la ai jingmut ba dei ban don ka jingiatreilang bad jing ia jan hapdeng ki pulit bad ki nongpyniaid shnong ban pyntikna ba kan don ka jingiada kaba paka ia ki nongsakhi.
U Sampath Kumar, IAS, Principal Secretary & Development Commissioner, ka tnad Social Welfare ka sorkar Meghalaya, u la ban jur halor ka jingdonkam ban don ka jingsngewlem bad ban iarap ia kiba la ngop ha kata ka rukom ban ym ktah ia ka jingsngew jong ki khnang ba kito kiba la ngop kin lah ban wanphai biang sha ka imlang sahlang da ka jingim ba thymmai. U la pynpaw bun na ki briew kiba la kyrni ha ka jingdih drugs ki lah ban lait na ka jingteh jingkhum jong ka lyngba ka jingiarap bad jingkyrshan bad ka long kaba donkam haduh katta katta ban ym pynbudnam ia ki hynrei ban ai sha ki ia ki jingiarap bad jingkyrshan ba donkam khnang ba kin bha biang bad lah ban im lang kum kiwei ki para briew ha ka imlang sahlang. Kum shi bynta jong ka jylli jong ka jingim, u la ban jur halor ka jingdonkam ban ai ka jingsumar kaba kyrpang bha ia ki khyllung, naduh kito kiba dang kha haduh kiba la phra snem ka rta, namar kane ka long ka rta kaba donkam haduh katta katta ha ka jingim ki briew ha kaba donkam ban pynlut ia ka por bad ban btin lynti ia ki ha kane ka por khnang ba ka jingim jong ki kan bha hadien habud. Katba ha ka rta ba ki khynnah ki la sdang samla, donkam ban kyrshan iaki bad shuh shuh donkam ruh ban phai khmat bha sha ki samla khnang ba yn lah ban rat diengkhong ia ka jingeh kaba mih na ka jingdih pynbuaid ha ka jylla.
Ha kane ka jingialang, la iakren ruh ba kumno ki shnong ki thaw kin shim ia ki sienjam ban buh ia ki VDP ha la ki shnong ba ki dong jong ki, da ka jingialam lynti bad jingai jinghikai na ka DREAM Mission. Ka la don ruh ka jingkyrpad ban dang buh shuh shuh ia ki jaka ai jingsumar ne ki rehabilitation centre ha ki shnong, ba kynthup ia ka shnong kum ka Mawlai, kaban ioh ruh ka jingkyrshan hapoh jong ka DREAM Mission. Yn sa pynlong ruh sa ia kawei ka lympung iamir jingmut bad ki nongialam niam kumjuh ruh bad ki skul ban iakren kumno ban buh bad ai jingkyrshan ia kine ki centre, da kaba phai khmat ha kaba iadei bad ka jingai jingkyrshan kaba janai. Ka sorkar jylla kan wanrah ruh ia ki kyndon treikam ba la pynthymmai ha kaba iadei bad ka VDP ban pyntikna ban don ka jingsngew longtrai bad jingkit khlieh halor ka shnong, da ka jingthmu ban wanrah shuh shuh ka jingpynkup bor bad iatreilang jong ka shnong.
I Bah Vivek Syiem, IPS, Special Superintendent of Police (CID), Meghalaya, Shillong, I la kren shaphang ka bynta ba kongsan kaba iadei bad ka kamram jong ki VDP ban teh lakam ia ki jingeh kiba iadei bad u drug. I la ban halor ka jingdonkam ban don ka jingiatreilang hapdeng ka VDP bad ki bor ka ain, bad I la kren ruh shaphang bun ki jingeh kiba mih na ka daw jong u drug ha ka thain. Ha ka presentation jong I, I la ngam jylliew bha halor ka jingkynrei jong u drug kaba la sdang ban kiew naduh ka snem 2018, da kaba ban jur ruh halor ka jingkem drug ba khah khah bad ki jingeh kiba mih na ka jingwan rung jong ki jingdih kiba ktah ia ka bor pyrkhat. Shuh shuh la kren ruh shaphang ka kamram jong ki VDP ba kidei ma ki kiba mih nyngkong eh khmat lada don kino kino ki jingjia, da kaba ban jur ia ka jingdonkam ban iada ia kino kino ki kam sniew bad ka jingshngain jong ki paidbah.
I Dr. Bethabara Decruse, Project Director jong ka Meghalaya AIDS Control Society, ha ka presentation jong I, I la pyni ia ka jinglum jingkhein ia ka jingdon kiba ioh iaka jingpang HIV ha Meghalaya bad katkum kane ka jingkhein ki briew kiba don ia ka jingpang HIV ha ka jylla ki long 0.39 na ka shispah, kaba la tam ia ka jingkhein jong ka ri kaba long tang kumba 0.2 na ka shispah.
La wan ban iashim bynta lang ha kane ka lympung jingialang da bun ki heh ki hain ba kynthup ia u myntri ka tnad Social Welfare ka jylla Bah Paul Lyngdoh, Sampath Kumar, IAS, Principal Secretary & Development Commissioner ka tnad Social Welfare Department, ka sorkar Meghalaya, Israel W. Ingty, IAS, Secretary ka tnad Social Welfare Department, ka sorkar Meghalaya, U Bah Vivek Syiem, IPS Special Superintendent of Police (CID) Shillong, Meghalaya, bad ki nongmih khmat jong ka Madanryting Village Defence Parties, ryngkat bad bun ki MLA bad MDC ka jylla, ki nongmih khmat na ki Dorbar Shnong jong ka Greater Shillong. Napdeng ki MDC kiba la iadon ha ka jingialang ki kynthup ia I Bah Latiplang Kharkongor, na Nongthymmai Constituency, I Bah Pynshngainlang Syiem, na Mawkhar-Pynthorumkhrah Constituency, bad I Bah Teiborlang Pathaw, na Mawlai Constituency.
La iadon lang ruh ki katto katne ngut ki MLA ka jylla ba kynthup ia I bah Brightstarwell Marbaniang, I Bah Adelbert Nongrum MLA, bad I Bah Sanbor Shullai.
Ka lympung ki MLA, MDC bad 76 tylli ki Dorbar Shnong: Ki briew ba don ia u HIV ha Meghalaya haduh 0.39 kaba la tam ha ka ri baroh kawei
