SHILLONG: Ka Ribhoi District Sports Association (RBDSA) kan pynlong ïaka lympung ïalehkai kynjatbol, ka Ribhoi League ia baroh ki Kynhun kiba napoh ka them Ribhoi kiba la dep pynïasoh bad ka RBDSA.
Haba kren sha ki lad pathai khubor, Chairman ka Football committee, u bah Banlumlang Lyngdoh u la pyntip ba ïa kane ka lympung yn sdang shwa da ka Women’s League, yn bud pat sa ka jingïalehkai jong ki shynrang kata ka 3rd Division, 2nd Division, 1st Division bad ka Super League Division.
Ki form naka bynta jong ka Women’s League lah ban ïoh naka ophis RBDSA bad ka tarik kaba khatduh kan dei haka 6 tarik, Naitung. Na ka bynta jong ki shynrang lah ban ïoh ïaki form naduh mynta ka sngi bad ïaka tarik kaba khatduh ban pdiang ïaki form kan dei haka 13 tarik Naitung bad ïaki tarik ban sdang kin sa pyntip sha baroh ki kynhun kiba wan shim bynta.
Ka RBDSA ka kyrpad ïa baroh ki kynhun kiba la dep ban ïa snohkti bad ka Association ba kin wan ban ïa shim bynta ha katei ka lympung bad kyrpang eh ïaki kynhun kynthei kaba dei ka sien kaba nyngkong ba naka liang ka RBDSA kan pynlong ïaka Women’s League.
Wer ka RBDSA ïa ki kynhun sha ka Ribhoi League, Yn don lang ka Women’s League
