SHILLONG: U Superintendent of Police (SP) ka Ri -Bhoi u Jagpal Singh Dhanoa, u la pyllait khubor mynta ka sngi ka 11 tarik Jylliew 2024, b alai ngut ki dkhot satar ka seng lehnoh Hynniewtrep National Liberation Council (HNLC) kila shah kem na them Ri-Bhoi.
Kiba shah kem la tip kyrteng kum u Cyfrank Paul Pariat, 25 snem na Ummat, u Kitbok Mujai, 23 snem na Ummat bad u Barnabas Lyngdoh 49 snem uba dei na shnong Khyndewsoo.
U SP u la ong ba ki pulit kila ioh ban pyndkut ia ka buit treikam jongki ba jar jar ha ka thain Mawhati-Umroi bad ha nongbah Shillong hapoh ka jingialam u Cyfrank Paul Pariat.
Katkum ka jingong u SP, kine ki la phah shithi dawa pisa na ki briew, da kaba byrngem ba kin sa mat ia ka jingeh lada kim ai kumba la dawa ia ka pisa.
Ia kine la kem ha ka 10 tarik Jylliew 2024 da ki pulit na Shillong ryngkat ki pulit ka Ri-Bhoi. U la ong ruh ba kine ki dei la wan shah hikai na Bangladesh mynshem snem bad kila don bynta ban pynrung dkhot sha ka seng, ban lum pisa na ki briew.
Ia ka mukotduma halor kane, la thep ha Umiam Police Station bad ka jingtohkit ka dang iaid halor jongki. Ha kajuh ka por, u la kyntu ia ki paidbah ban ym pyndem ha ka jingshah dawa pisa ha ki dkhot jong ka seng, hynrei ki dei ban pyntip sha ki pulit.
Ngat 3 ngut ki HNLC ha shrip ki pulit ka Ri Bhoi ba dawa pisa
