SHILLONG: U Prof. Lakhon Kma u kyrtong shimet ba aireng ha kane ka ilekshon MP Lok Sabha na Shillong Parliamentary konstiwensi, u la ong ba ka daw ka jingshah rem jong u lehse ka lah ban dei namar ka jingbym don ia ka party ba biang.
Haba kren sha ki lad pathai khubor, u Prof Lakhon Kma u la ong ba kum u kyrtong shimet ula trei shitom bad lada dei ba u iakhun na ka party ba biang, ka jingiakhun kan long kaba iabeh.
U Prof. Kma u la ong ba ilekshon MP ban iakhun kum u kyrtong shimet kam dei kaba suk hynrei watla katta ki paidbah ki la ai ka jingkyrshan bad ka jingshaniah ba skhem ia u haduh ba u la ioh haduh 18582 vote.
Halor ka jingioh tam bun ka vote jong u ban ia ka UDP na ki 15 tylli ki konstiwesni, u Prof Kma ula ong ba kane ka lah ban dei ba ki paidbah ki kham lah bad ki kham sngewiahap ia ki mat treikam jong u.
U Prof Kma u la ong ba wat la u la shah rem ha kane ka ilekshon, un nym kynran dien namar naduh ba sdang ka jingthmu jong u ban rung sha ka jylli politik kam dei tang na bynta ban iakhun ia ka ileksjhon MP hynrei un nang iai bteng beit ia kane ka kam.
Haba kylli hato u don jingthmu ban iasoh party noh, ula ong ba ki don ki party kiba la kwah ban iatreilang hynrei um pat kwah ban rai kyrkieh namar ba shisien ba la rai ban rung ym don por ban iakhih shane shatai namar kan ktah ia ka burom kum u nonghikai lada kynthih na kawei ka party sha kawei pat.
Lah don ki seng sain pyrthei kiba khot, tangba ym pat rai kyrkieh: Prof. Lakhon
