SHILLONG: U Chief Secretary ka jylla u bah Donald Phillips Wahlang mynta ka 3 tarik Jylliew 2024, ula pyllong ia ka jingleit jurip ia ka jaka niew vote lashai ka sngi ha madan Polo, Shillong.
La synran ia u Chief Secretary da u Chief Electoral Officer u Dr. BDR Tiwari, u Returning Officer ka Shillong Parliamentary constituency u SC Sadhu, nalor u SP u Rituraj Ravi bad kiwei.
Haba kren halor ka jingpynkhreh ia ka jaka niew vote, u Chief Secretary ula pynpaw ia ka jingsngew hun jrut bad kyrmen ba ka jingniew kan iaid beit kumba la pynkhreh khlem kano kano ka jingthut.
U la ong ba ka jingniew vote kan sdang naduh 8 baje mynstep haduh ban da dep. Ha Shillong Parliamentary constituency, ki don 8 tylli ki jaka niew vote ba kynthup ha Shillong, Jowai, Khliehriat, Nongpoh, Sohra, Mairang, Nongstoin bad Mawkyrwat.
Ngi la hun jrut ia ka jingpynkhreh ia ka jingniew vote: CS
