SHILLONG: Hadien ba la kut ka jingai por 6 bnai, ka dorbar shnong Laitkor Mawrie Lumheh ha ka 1 tarik u Jylliew 2024, ka la leit ban jurip ia baroh ki dukan, ki karkhana, ki petrol pump ban pynthikna ba ki bar jylla kim don shuh, kumba la ai por.
Ha ka ha ka 1 tarik u nohprah 2023, ka dorbar shnong ka la shim ia ka rai ban ym shah shuh ia ki bar jylla ban seng kam bad ban trei hapoh shnong, namar ba ka kwah ban kiew ki para Khasi ha ka kam khaïi pateng bad ki kam ki jam.
Hynrei kaba lyngngoh, ka long ba ka jingioh lad ki bar jylla ban wan ha ki por ba la dep, ka dei namar ba don ki Khasi kiba la pynshah kyrteng ne leh benami ia la ka kyrteng katba ka kam pat, trei bad pyniaid u dkhar.
U Rangbah Shnong u Bah Pynshai Mawrie u la ong ba hadien ka shnong ka la lap ba ki don shibun ki bar jylla kiba trei ba ktah ha ka shnong khlem ioh ia ka No Objection Certificate (NOC), bad kiba shu plie dukan ha ka kyrteng ki Khasi tangba u trai pat u dei u bar jylla da kaba pynshah kyrteng ne leh benami, ka shnong ka la shim ia ka sienjam ban ym ailad shuh bad ka shnong ka la beh ia ki bar jylla kiba wan trei wan ktah bad ban seng kam.
Kumba 20-30 tylli ki dukan ki bar jylla kynthup kiba leh benami, kiba don ha Laitkor bad ka shnong ka la maham ba kito kiba la khang kiba la mih, kim dei ban leh biang bad lada lap ka shnong kan leh da kaba tyngeh.
Ioh jaka ki bar jylla ba pynshah kyrteng ki Khasi ha Laitkor
