SHILLONG: Mynta ka sngi ki MLA kiba dei ki dkhot jong ka Committee on Government Assurances (CGA) ka iing dorbar ka jylla, ki la pyllong ia ka jingjurip ia ka karkhana Mawmluh Cherra Cement Limited (MCCL) ha Sohra, hapdeng ka jingther u lapbah.
Ia kane ka jingjurip la ialam u chairman ka Committee u bah Renikton Lyngdoh Tongkhar, MLA lem bad u bah Gabriel Wahlang, MLA, bad bah Matthew B Kurbah, MLA nalor ki ophisar, kiba iakynduh ia ki nongtrei kane ka karkhana sorkar, kaba la ring swai ha kaba ka sorkar ka la pynkhreh ban pynkhyllem noh.
La don lang ruh ka Managing Director ka MCCL, ka kong W.A.M. Booth, u Chief General Manager ka MCCL, u bah K. Lyngdoh.
Ha ka jingiasyllok bad ki nongtrei, u Chairman u bah Renikton ula pynpaw ba kam I don jingkyrmen shuh ia kane ka karkhana ka sorkar ban pynkhie im biang na kiba bun bah ki daw khamtam ka jingbam hati kit kulai.
Ka Committee ka la mynjur ban ai jingmut sha ka sorkar jylla ban pynkylla Museum noh ia kane ka jaka kaba don ka karkhana katba ia ka jaka sah ki nongtrei ka MCCL, sha ka jaka ki nongwankai suwari ne Resort, ha kaba ki nongtrei ka MCCL kin ioh ban pyniaid ia kine. U bah Renikton u la ong ba ia ka phyllaw yn sa pylla sha ka jaka jngohkai khnang ban lah ban pynmih pisa.
Ai jingmut ka CGA ki MLA ban pynkylla Museum bad Resort ia ka MCCL
