SHILLONG: U Myntri ba khmih ia ka kam Jngohkai ka Jylla uba dei ruh u nongaiktien ka Sorkar MDA-II, u Bah Paul Lyngdoh u la ong ba ka nongbah Shillong ka donkam kyrkieh ia ka lynti iaid kjat, bad ka Khyndailad ka donkam bha ia kane ka lynti, namar kadei ka jaka ba ki nongjngohkai ki bun.
Haba kylli, u la ong ba ka Sorkar ka la ioh ia ka jaka kaba paka na ka bynta ki briew kiba die madan ia kaba yn pyndep ha u Jylliew mynta u snem, bad u la iathuh ba kane ka jingthmu jong ka Sorkar ban pynkynriah noh ia kiba shongdie madan kadei hadien ba la ioh jingkyrshan ruh na ki briew kiba die madan, ha kaba ki la don 200 ngut tang na Khyndailad kiba la register ban ioh jaka shong dukan ha ka jaka ba la pynkhreh da ka Sorkar.
Haba kylli halor ki nongshong die madan, u la ong ba na ka liang ka tnat badei khmih ka la lum jingtip shaphang ki nongshong die madan, bad tang kito kiba dei ki trai shnong na Meghalaya kin ioh ia ka jaka ba la pynkhreh da ka Sorkar.
Ka nongbah Shillong ka donkam kyrkieh ia ka lynti iaid kjat, ong u Bah Paul
