SHILLONG: Ka Hynñiewtrep Youth Council (HYC) mynta ka sngi Balang ka 22 tarik Jymmang kala leit buh 5 tylli ki jingdawa hakhmat u Director ka North Eastern Indira Gandhi Regional Institute of Helath and Medical Sciences (NEIGRIHMS), khamtam na ka bynta ailad ia ki samla ka Jylla ban ioh kam bad ban ioh pule ha katei ka skulbah kaba dei ruh ka jaka sumar.
U president rangbah ka HYC Bah Roykupar Synrem u la iathuh ba ki jingdawa ka seng ka long ban thungkam ia ki samla ka Jylla kum ki nursing officer ha ki kam ba ki briew ba la shah jied kim shym la leit trei satia, u la iathuh ba ka Nursing Officer Recruitment Common Eligibility Test (NORCET) ka la pynlong ia ka exam thep kam nurse ha NEIGRIHMS kiba lait ha u snem ba la dep kumba 220 tylli, bad kumba 40-50 ngut ki khlem leit trei satia bad ia kine ki kam dei ban thungkam biang ia ki nurse trai Jylla kiba la shakri kum ki nongtrei contract, bad dawa ruh bay m dei shuh ban pynlong ia ka exam thungkam lyngba ka NORCET.
Kawei pat ka mat ba ka HYC ka la rah ka long ha kaba iadei bad ka jingai bhah ia ki samla pule ka Jylla ban pule doctor MBBS, ba dei ban kyntiew noh na kaba ioh mynta kaba long 14 ngut napdeng 50 ngut kiba ioh pule doctor. Nalor kane ka HYC ka la dawa ruh u Director ka NEIGRIHMS ban ailad ia ki samla ka Jylla ban pule hapoh ka College of Nursing ba kynthup ha ka kyrdan M.Sc Nursing kaba don 10 seat bad B.Sc Nursing kaba don 50 seat, namar katkum ka jingong u Bah Synrem, na katei ka jingpule haduh mynta kam shym don ka jingbhah kyrpang ia ki samla ka Jylla.
U President ka HYC u la iathuh ba na liang u Director u la pynpaw ba naduh mynta u snem yn pynkiew noh ia ka seat ban pule ha ka B.Sc Nursing sha ka 100 bad na kane 30 percent yn mang kyrpang na ka bynta ki samla ka Jylla ban iohlad ban pule. Katba ha kaba iadei bad ka jingpule doctor MBBS na ka liang u Director u la kular ban pynkiew ia ka bhah sha ki samla ka Jylla, bad ha kajuh ka por u Bah Roy u la pyntip ba ka jingpule doctor ha NEIGRIHMS ruh ka lah ban kiew noh sha ka 100 seat, kaba mut b aka bhah ia ki samla ka Jylla ruh kan sa kham kiew shuh shuh.
Ka HYC ha kane ka jingiakynduh bad ki nongpyniaid ka NEIGRIHMS ka la dawa ruh ban pynsting ia Recruitment Rules (RRs) ha kaba iadei bad ka kam Store Keeper, namar kumba ka long mynta ki jingdonkam ba la pan na ka bynta katei ka kam ka long shaba palat, la kumba la thmu ban khanglad ia ki trai jylla kiba la trei bad don jingtip ia ka kam. Ha kajuh ka por ka seng ka la pynsngew ruh ha ki heh ka NEIGRIHMS ba ki trai Jylla kiba shim kam kum ki contract ha katei ka jaka sumar kidei ban ioh ruh ia ki Trading Licence na ka KHADC, bad kyntu ruh ba ka NEIGRIHMS kadei ban pyrkhat shwa ia ki trai Jylla ha kaba iadei bad ka jingai ia kano kano ka kam.
Naduh ka pule MBBS bad thungkam kohnguh u Director ka NEIGRIHMS ia kiba bun ki mat dawa ka HYC
