SHILLONG: Ka Meghalaya Biodiversity Board mynta ka sngi ka la rakhe ia ka sngi iada ia ki kynja ba im bad ki sawdong sawkun ne ka International Day for Biological Diversity halor ka tien phira “Long ka bynta jong ka jingthmu” ha U Soso Tham Auditorium Shillong.
U Chief Secretary ka jylla, u bah Donald P Wahlang ula ong ba u khun bynriew u shaniah ha ka mariang ban ioh ia kiei kiei ki jingdonkam jong u.
Ka Meghalaya Biodiversity Board ka la rakhe ia kane ka sngi ryngkat ka National Biodiversity Authority.
U Chief secretary u la ong ba ka Meghalaya ka dei ka bynta jong ka Indo-Burma Biodiversity Hotspot, ha kaba ki sim ki doh, ki mrad ki mreng, ki khlaw ki btap ki don hapoh jongka. Na ka jingma jong ki kynja ba im bad ki jaka sah jongki, ka Meghalaya Biodiversity Board ryngkat ka Forest Department ki don ka bynta kaba khraw.
La thaw ia ka Meghalaya Biodiversity Board ban pyntreikam ia ka Biological Diversity Act, 2002. Haduh mynta la thaw 6459 Biodiversity Management Committees (BMCs) ha ki shnong bad ki Local Bodies bad 9 tylli ha ki Urban Local Bodies kum ka jingdon ki shnong. Ki Deputy Commissioner, Block Development Officer bad ki District Nodal Officer jong baroh District ha Meghalaya ki don ia ka bynta ba kongsan ha ka.
Ka Board ka la ju pyllong ia ka jingpynshai paidbah ban pynsngewthuh ba kin kiar na kaba pynjot ia ki khlaw ki btap bad ki kynja ba im.
Ha kane ka prokram, nalor u Chief Secretary la don lang u P. Bakshi. IAS, Commissioner & Secretary, Forest and Environment cum Chairman, u R.S. Gill, PCCF & HoFF bad u S.M Sahai, IFS, PCCF (Wildlife & Biodiversity), ha kaba la pyllait ruh ia ki poster bad ki kot lyngkdop halor ki kynja ba rim ha Meghalaya bad la sam khusnam sha ki nongjop ha ki jingiakop.
Ia ka khusnam Best Biodiversity Management Committee Award (BMC) 2024 la ioh ka Paglapara BMC, Zikzak C&RD Block, South West Garo Hills, Meghalaya, ia ka State Level Biodiversity Conservation and Sustainable use of Biological Resources la ioh ka Jermanai Village, Umling C& RD Block, Ri-Bhoi District, Meghalaya.
6 hajar tam ki BMC yn thaw ban iada ia ka mariang bad kynja ba im
