SHILLONG: Ha ka jingbteng kyndang ia kiba dih drok, mynta ka janmiet sngi thohdieng ka 17 tarik Jymmang 2024, ka seng Hynniewtrep Youth Council-HYC ka la ioh ban bat bun ngut ia ki nongdih drok katba ki dang iashong ha kawei ka jaka ha Upper Mawprem.
Kiba bun kine kiba ioh bat ka HYC kiba dang iadih drok, kim dei ki Khasi hynrei kiwei pat ki jaitbynriew.
Ka HYC ka la pyllong ia ka jingkhynra hadien ba la ioh ia ka jingujor na ki paidbah, ki nongshong shnong ia ka jingjyllei ki nongdih drok, nongdih kynja ha katei ka thain, kaba la wanrah ka jingsyier ia ki briew.
Ka HYC ka la ioh sei na ka met kitei ki khynnah dih drok ki thyrnia injek, ki denrite , u kynja bad kiwei kiwei de.
Dang shen, ka seng ka la pyllong ruh ia ka jingkyndang ha ka thain Khyndai Lad bad ka la ioh bat kumba 22 ngut ki nongdih drok.
Ha kane ka jingkhynra ka HYC, la wan ai mynsiem bad kyrshan ka shnong Upper Mawprem, kaba la pynpaw ba kan iatreilang nangne shakhmat ban rat dyngkhong ia ka jingsniew na u drok ha katei ka thain.
Hadien kane, ka seng ka la leit talasi ruh ha ka thain Mahari bad ka la lap ia ki katto katne ki samla Khasi kiba dih drok bad ka la ioh kurup ki thyrnia, drok.
Katba dang iadih drok, kynrup ka HYC ia kiba bun ha Upper Mawprem
