SHILLONG: La pynlong ia ka “Kilometre Zero”, ka prokram ba kyrpang, kaba kynthup ia ka sap shna sap dro, ka jingpynneh pynsah ia ka shet ka tiew ha Linsamer farms, Kydemkulai, ha ka 11 tarik u Jymmang.
Ka prokram ka pyni kumno ban lah ban ioh ia ki jhur ki jhep bad kiwei dei da kaba kheit ia ki sla ki kynbat na khlaw kiba don ha Linsamer, ban pynduna ia ka carbon footprint ne ka jingjaboh bad ha kajuh ka por ruh ban rah burom ia ka jingiadei hapdeng ka mei mariang bad ka sap ka phong.
La ialam ia ka prokram da ki nongshet ba pawnam, Chef Ahme bad Chef Dalarympei, bad ki nongshim bynta ki la ioh ban iaid ryngkat bad ki ban mad ia ki jhur ki kynbat ba bun jait kiba pynphuh pynphieng ia ka Linsamer Farms.
Shuh shuh, ki nongshim bynta ki la ioh lad ruh ban shim bynta ha ki kam pynpynngad jingmut ba la ialam da i Maya-ika. Ki la ioh ban pynpaw ia ki jingsngew bad pyni la ki sap ki jinsngew jong ki ha ka jingdro bad ai rong. Ki la ioh ruh ia ki seed papers ban thung kum ka dak jong ka jingpynthymmai bad jingkylla da kaba ki bret noh ia ki jingeh jingshon jong ki.
Ia kane ka prokram la pynwan dur da Lamerphylla Kharsati, Maya Ika Lamar bad Dalarympei Kharmawphlang.