SHILLONG: Ka tnad iada mariang ka jylla ka Revenue & Disaster Management Department ka la iathir mynta ka sngi bad ki Deputy Commissioner jong ki district ban thaw lad kumno ban iada bad ban iarap ia ki briew haba khie kynsan ka bor mariang, kum ka lyer, phria bad kiwei.
U Commissioner & Secretary ka tnad Revenue & Disaster Management Department, u Sanjay Goyal u la ong ba namar ka jingwan ka aiom pyrem kaba wanrah ia ka erlang thari, phria bad kiwei ki bor mariang, la iathir kumno ban ai ka jingiada bad kumjuh ka jingiarap ia ki paidbah kiba iakynduh.
Katkum ka jingiathuh u Goyal, ka sorkar ka la mang 20 klur tyngka sha ki Deputy Commissioner ban ai ka jingiarap kyrkieh sha kito kiba shah ktah ha ka eriong erngid.
U la iathuh ba khnang ban tip kumno ban iada ia ka bor mariang, la iathir bad ki tnad bapher bapher kum ka PHE, Health, Education, IMD, SDRS, Civil Defence bad kiwei. La bynshet ha ki Deputy Commissioner ban leh ia kaba donkam haba don kano kano ka jingshah ther ha ka bor mariang.
Ban pynsuk bad ban pynsted ia ka jingmareh haba don kano kano ka jingjia ka bor mariang, la buh ia ka Control Room kaban treikam u number baroh 24 kynta.
U Goyal u la ong ba la khmih lynti ba ka lyer eriong kit slap kaba jur kan bteng haduh u bnai Jylliew ban wan.