SHILLONG: Ha ka sngi Nyngkong, u myntri rangbah ka jylla u Conrad K Sangma, ula leit jngoh ia ka jaka theh niut kaba don ha Rongkhon Songgital ha nongbah Tura, kaba dang iaid shaid shaid ha ka jingshna.
Ia kane ka jaka theh bad tylliat niut la shna da ki tiar juk stad, ha kaba yn sain sboh bad kiwei ki jingdonkam kiba lah ban shna na ki jaboh. U Conrad u la ong ba ka jingeh ban pynkhuid bad bret jaboh ka jur bha ha kine ki sngi khamtam ha jaka sor.
U la ong ba kane ka kompeni kaba shna ia ka jaka theh niut ha Tura, ka dei ruh kaba shna ruh ia ka marten ha Shillong. Ia kum kane ka jingshna ia ka jaka theh niut, yn shna ruh sha kiwei ki jaka ha ka jylla.
Ha kane ka jaka lum jaboh, yn don lai bynta, kaba nyngkong ka jaboh ba pyut, nangta ka jaboh kaba lah ban thang bad kawei pat ka bym pyut.
Kane ka kompeni ka dei kaba la shna ia ka jaka theh jaboh ha Tinsukia ka Assam.
Ha kajuh ka por, u myntri rangbah u la ong ba ka sorkar ka la bthah ia ki bor Municipal ban pyniakhlad ia ki jaboh kiba pyut bad ki bym pyut naduh thliew ïing.