LAWSHLEM: Ka iing trep buh khunlung ha lyngkha ha shnong Lawshlem ka la ktik ia ki briew kylleng ka ri India ha ka social media.
Ia kane ka ïing trep, kaba ai kyrteng, Ka Trep I Mei, la shna hi ki longkmie ka Iatreilang Village Organization, Lawshlem, ryngkat ka jingai jingmut ka Iarailang Cluster Level Federation (CLF). Ka shnong Lawshlem ka hap ha Mawphlang C&RD Block, East Khasi Hills.
Ha ka 3 tarik Jymmang 2024, ka dkhot ka National Commission for Women ka kong Delina Khongdup ka la hiar ban jngoh kyrpang ia kane ka trep hadien ba ka la iohi lyngba ka social media.
Ka kong Delina ka la ong ba ka dei ka jingsdang kaba rit eh bad ka nuksa ban pyni sha ka pyrthei khamtam ba ki Khasi ki shim ia ka jinglong jait na ka kmie. Ka la ong ba ka NCW ka ngeit ba ka jingpynkup bor ia ki kynthei ka long kaba donkam ha baroh ki liang bad kane ka jaka buh khunlung ka long shi bynta kaba ai mynsiem, bad kaba iaid katkum ka jingthmu ka NCW.
Ka la ong ba lyngba ka NCW, kan iakren ban thaw lad lyngba ka National Crèche Scheme ba kin lah ban aplai, khnang ban pynjanai shuh ia kane ka trep.
Ka secretary ka Iatreilang Village Organization, Lawshlem, ka kong Twissida Khyriem ka la iathuh ba la shna ia kane ka trep da ka jingai jingmut na ka CLF, bad la shna ha u Nohprah 2023 bad la lah ban pyndep 3 sngi, da kaba iamih baroh ki dkhot para longkmie. Ka la ong ba mynshwa, ki shem jingeh ban rah khun sha lyngkha bym don nongpeit hynrei naduh ba don kane ka trep, kila sngew hun ka mynsiem ban buh ia ki khun ryngkat ki nongpeit, katba ialade ki leit ban lur lyngkha da ka jinghun mynsiem.
U Rangbah Shnong u bah Tisharland Nongbri ula ong ba ka shnong ka ai mynsiem ia kine ki dkhot ka village Organisation ha kane ka kam. Ha kane ka jingjurip ka dkhot ka NCW, la synran lang ki ophisar na ka tnad Social Welfare ka jylla.
Khring ‘ka ïing trep i mei’, ha Lawshlem, hiar ka jngoh ka dkhot ka NCW
